मोनसे बिन्दो नागिरनानै Poem by Ronjoy Brahma

थांखियाव आगानखौ होदों
नाथाय बिन्दो मोनाखै,
थांखिया फेलें जायोब्लाबो
गोफार मिजिंआ थाबावोब्ला,
आं गंग्लायनाय नङा-
दलरै आं जेनबाय होन्ना।
आं जुजिगोन सान्दुं-अखाजों
बिरफानो दाउसिनफोरजों,
आं जुजिगोन बार-लैथोजों
सानस्रिनो ना खासेवफोरजों,
गोसोआ गाबो-
मिजिंनि हाबिलासा बाङो-
खन्थाइ आवराय आवराय-
थरथिं थरथिं गसरनाय
महर गैयै गोसोनि मोदैया,
बोहैयो दान्दि मोनफ्रोमाव-
मेथाइ रोजाब रोजाब
गोरबो सेर्जानि हुब्लिरनायजों।
खाराव माराव गाबो जोमै सोगोमनायाव
अखा हाहां हाहां मोखां,
बोहैयो समनि खबामा
थरथिं थरथिं मोदैनि आगानसो;
थेवबो बोहैयो लासै लासैनो
गोरान बिलाइ फोजाव फोजाव
मिजिंनि मेथाइ रोजाबो गोरबोआव।