जाहिर Poem by Ronjoy Brahma

जाहिर

Rating: 5.0

सना दखना गान्नानै फुंबिलि समाव
लोगो हमफैदे मिनिस्लु मिनिनानै
खानाय बिरहोना रैसुमै बाराव
-
मिनिसुलु सना देलायनानै
फैदोल' नोङो लाइमोन गोसोनि बिगोमा जानानै
बाराव बिरनाय गोसोखौ बुरखायनानै
-
आं नोँखौ मोजां मोनो
ओरैबादि मोजां मोनोदि
सिखिरिया नोँखौ जाम्बिसो सानगोन
नाथाय बियो जाम्बानि सान्नायसो
फै नोङो गाबज्रि हरनाय आंनि
रैसुमै खबामनि आगानजोँल'
-
मुलुगा फावथिनासालि सेक्सपीयेरनि
जाय नोँ सान्नायबादि नोरोक नङा
फैदोल' सना नोङो-
साबसिन फावथिना हानजायाव
जायखौ अख्रांनि हाथर्खि हाला
नोरोकफुरिनि बयबो आफा खबो
-
नोङो नंखायखौ मिनिनो नाङा सना
गले गले देरहानायनि थाखायबो
सैथोनि देरहानाया खेबसेल'सो
नाथाय बे देरहानायाव नोँ रंजाया
रंजागोन मुलुगनि दंनायमानियासो
-
आंबो रंजागोन सना साबसिनै
नोँखौ जुलि लानानै
नाथाय नोँनो होनो जेबो गैया आंहा
जाय आंनाव जोनोमनिफ्रायनो गैखाया
अब्लाबो आं बावनाय नङा
नोँनो अन्नायखौ होनो सना
-
हाथर्खि हाला सान अखाफोर
दैमा-दैसा हाजो हाला
बिफां-लाइफां दाउमा-दाउसा
जोँनि संसार मोनसेनि सुखु-दुखु
-
बिसोर जोँखौनो नायहरगोन
अरायसम अराय जिउ
मोजां-गाज्रिनि खौरां लागोन
मागो-बैसागु रंजाफागोन।

Friday, October 23, 2015
Topic(s) of this poem: love
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success