मेंग्लिनाय मेगननि जोख्लोबनायाव Poem by Ronjoy Brahma

नाङाफाङा दुखु गोनां
दाहोना लावखारनि सिफुं दामनाय
गोसोआव फैयो
मेगनाव जाखाङो
आय' गैलिया मोकथां बियो
-
गोदो गोदो उन्दुनाय समाव
रुम्बां रुम्बां खाम
दामनाय
गुर्लाब बाग्दावलायनाय फुंआव
आय' गैलिया सिमांसो बियो
-
सिमांआव नारसिन जायो
बगलरिदनि खे खे मिनिनाय
लानजाय फिथें मोसानाय दाउलुरनि
रैसुमै गारां खौऔनि
आय' सिमां-मोकथां बैसागुआ दिनै
-
बोहैगोलाव समनि आसौ बिसौ
बादुवा गेलेनाय आलो जाम्फैयाव
आय' गैलिया मोकथां बियो
खांख्राइया थैबाय ज्रिं रानलांबाय निजोरा
-
बगलरिद गाबो गेब गेब
नै आबै नोंनि खुगा गागेब गेब
एम्बु खुगा आबौ जालुवा
गैले समनि बिन्दोआव
आय' सिमां सिमां दैज्लां-मेसें
-
गबजब गबथब कातिक-मागो
सल' जारि रामायण महाभारतनि
दुंब्रुद अगदाबाव
आखाय हांस्रोना गत गत
फोरमायलु फारि फारि खिन्थानाय
आबै-आबौनि
गैले आय' उदां-दुफांनि बाज्ल'नायाव।