बिमानि मोदै Poem by Bidindra Basumatary

सुखु-गोजोन, खौसे गैया जाबाय
बड'लेण्ड बिखायाव
गावजों गावनो जायो जेब्लाबो
सुथुर..........।
गैलिया जोंनियाव साननाय
खौसेथिनि गोहोनि फारसे,
नारानाथा जायो जों
गावजों-गाव सेरखाय-बेरखाय;
नायनो हाया जों गुबुननि गोजोन
दानानै लानो रोङा जों गोथार जिउ,
गैयि जोंनियाव गियान होबथानो
सिम्ब्रेनाय बारहुंखाखौ।
दिनै बिमानि मेगनाव मोदै
गोसोआनो जाया जोंहा बुजिनो
मानो मोदै बिमानि मेगनाव?
आवगायलांलिया जों हुगारनो
बिमानि मोदैखौ;
सानसेदि जागोन बाना
बिमानि मोदैजों
सानलिया जों बेखौबो
जिउ मोनसेयाव।
बिमानि मोदै, ग'बोयो
गावजों गाव खौसे गैयि
इनाय अनागार आखुआव;
गोसोआनो जालिया गानहोनो
खौसेथिनि लोखौ बिमानो।