नों बिफाया नाजावदो Poem by Bidindra Basumatary

बाथौनि बान्दोआ बान्दोबा
सिजौनि सिरिया सिरिबा
सिफुंनि गुदुंआ गुदुंबा
बाथौनि सान्थौआ सान्थौबा
हे सोरजिगिरि नों बेसे गोमोथाव!
साननाय मावनाय नों बिफानि
थैनाय-थांनाय नोंनि आखाइयाव;
सुबुंआ मोजांखौ सोलोंनो
नोंनि मुं लायो,
दाउसा फारौ बाउयो
बिबार प्रसाद होयो
आलारि बाथि फोजोंना।
नाथायदि,
आंदि जेबो होनो रोङा
खालि गाबज्रियो गोसो गोर्बोजों
अराय नों बिफानिल' मुं लायो
सुखु-दुखुनि समाव
सान-मोना जेरावखि थाया
सिबियोल' थार गोसोजों।
आंनि गोसोआ मानोबा
बेजोंनो जागोन सानो,
नों बिफाया बेखौनो नाजावदो
गोसो खुसिजों आंखौबो नायहरदो।