कम्बुकरणनि सिखारनाय Poem by Ronjoy Brahma

निन्दोआव गोग्लैना दंमोन
आंहाबो अनजालि दं सिमांनि
गोदो गोदो सिमां नुदोँमोन
आलो गोजोन संसार जानायनि
-
आंखौ फोजायो
बिसोरो दाख्राय दाख्राय
खाम जथा-
जाबख्रिँ थोर्सि दामनानै
बिसोर आंखौ फोजायो
-
गाग्लि गाग्लि
बागुरुम्बा-
खेराय गारजा कृष्टि मोसानानै
-
हारि राव
जै होयो
बिसोर आंखौ फोजायो
जारिमिननि देँखो सेर्जा हुनानै
-
गोदै मिनि-खुसि
उन्दुहाब दंमोन
सोर्गोआव गिदिँ गिदिँ
बिसोर आंनि सौखि बेल्थायो
-
उखैयो आं-
सिरि मोनब्ला बिसोरनि
एवथु एवथु फोजानाय
हायलालाय-हुयलालाय मोसायो
रंजालि बैसागिमोन
-
मानि मोसानाय?
मानि खबाम-
बिग्रायनाय गोनां देँखो?
आं उखैबाय
अब्लाबो कम्बुकरणनि आदार
सोर राबणा होफैगोन?
-
आर'नाय फालि
गाम्बारि सोमस्रिनि आखायजोँ
बोगदाद बुगदाव जोहोलावफ्रा
आंनि सारामाय थेबो
आं सासे जोहोलाव दा
-
थैनाय थांनायनि खोथा गैया
बिसोर आफा खबो
ख्रब ख्रब ख्रब
जै होयो बयबो
आं दा आगान सुरबाय
-
उखैनाय जोबोद उखैनाय
नांगौ आदार
-बुंजासे उदै
सोर सुथुर रायजोनि-
थांगौ फोजोबनो सुथुर।