खांख'मानि गाबनायखौ आं खोनाबाय Poem by Ronjoy Brahma

बेसेबा समनिफ्रायनो
थारुन ओंख्रि दालि ओंख्रि
सोलायै लोँस'नै
खिसन खिसन गालांबाय बियो
सियालआ जेरै बेबादिनो
-
बिनि उनावबो नै दाखालै
सामब्राम बेदर फानलु गोमोन
अख्ला अख्ला गालांबाय
मिनि खुसि बेबादिनो सोदोमस्रि गैयै
संसार खावसे बारहोबाय बियो
-
बर' बोरायनि राव-
खनसेखौ खाव
हाथारोब्ला खेबनै खाव
बिनि उनाव आरो दाखाव
बाथ्राया सैथो सैथोथार
-
फुंनि रैरुब साननि मेगन खेवनाय
अनजालि मिथिँगानि फोजानायाव
मेगन बिलिर बिलिर आंबो सिखारदोँ
सिमांखौ नुयो आंबो
सिमांआ सिमांआनो
-
अब्लाबो माब्लाबा सुथियो
दिनै बेबो सुथिनायनि बाथ्रा
खेबफ्रोम सिमांआव बेखौनो नुयो आं
बिसोरखौ फेजेन्नाय
-
मोखां सुना
हाथाइ मानजिनायनि उनाव
ओंख्रि दोखौ बोलादोँ आं
गाबख्राव बायदोँ सिबाय खांख'माया
-
नाथाय-
रैखा मोन्नाय नङा नोङो
खेबसे खेबनै खेबथाम
आंनि खहा खालामबाय
बेखायनो नोँखौ आं सुथुर सानथारो।