खन्थाइ सिखाव आं बदनामा बेनो? Poem by Ronjoy Brahma

आंनि जोनोमनि सिगांनो
हायेननि सुफिन प्रमद बाबुआ
हादान फाथिहैबाय-
दिमोल खुन्दानि निजोम सेराव
गोजामनि बारै गामि गोदान
-
मालायनि बिजाब गला
बिजाब बाख्रि आरो मेला
गिला-लाजिया गरनैसो रांजोँ गिदिँना
खानाय गुफुद अख्रां गंसे लुबैसुला
ब्रजेन ब्रह्मनिफ्राय मिथिबाय आं
अन्नाय गैयैयै कालिचरणनि
जौ बुख्रुबनायनि सल'
-
मेथाइ गल' खोनासंग्रामोन बियो
मेथाइ बुथुमबायग्रा
स्कलार महिनि सारनिफ्राय खोनादोँ
गुरुदेबनि हाग्रा एवस्रांनाय
फोर्लाँ बाबानि रजं खनबायनाय
-
बड'लेण्डखौ मोनबानो जाथारसिगौ आंनो
अब्ला ओँखामबो खहाबसिगौ
हा मानोथो नांबावगौ आरोलाय
ब्रजेन ब्रह्मनो अख्रां गंसेखौलाय?
-
बाबांसिन मिथिँ-दावथिँ गिदिँबायो आंबो
सानसे खोनाबोदोँमोन उर्खाउ आदैनि
उदांनिफ्राय गिदिँबोनायनि रादाब
दिनै बेखौनो बिजिरनो नांदोँ
उदांखौ आं नुबाय
बिनि ब्लां ब्लां अख्राङाव
मानोथो बुंनांखो बेलाइ
उदांनिफ्राय गिदिँफिन्नानैलाइ?
-
आंदि खन्थाइ सिखाव
आं मानिनानै लानो लुबैया
नाथाय बिसोर आंखौ सोङो
नोँनि सान्थौआ मा?
जाम्बाथां-सियान्थां बुंफ्लाङो आं
जेराव थैनांगौ बेयाव थैगोनानो
-
बिसोर आंनि लोगो
जायफोर आंखौ लोगो सानो
बिसोर मिनिबा आं मिनिया
नाथाय बिसोर गाबोब्ला
मोदै फसर फसर आंबो गाबगोन।