संग्राय सान्द्रि Poem by Ronjoy Brahma

बिमा-
हा नोँसालाया बहा थांदोँ?
माथो गलायाव सिगारेड् सोबनायसो
नुबोदोँ आंलाय म'आ म'नो
बिदिब्ला आइ एसनि सिमांआ?
-
अ' बिदिब्ला नोँ आंखौ
संग्रायखौनो सानलायबाय
सान्दांगाया नोँनो जामारबाय?
आरो फिसाया जा खिगारो
आंनो आजाव जोबनांगौ?
-
न'नि दाउखि गोबोरखौ
न'नि दाखोर दालाखौ
सोर गारनो
नोँ नङाब्ला?
-
दाखोरखौ न'आव नङा
बायजोआवसो नुदोँ नोङो
नोँनि थाखायनो जादोँ सुनि
सालि नोङो रग' रग'
आंनो आजावगोन संग्राय जाना
-
जुथेसो बुंदोँ गाज्रि जाथारबाय गथ'आ
जायगारनो हाया नामा नोङो?
-
आं मालाय बेसे जावगारनो?
नोँबोथ' हायोना सालिनो
आं दुखुमोनोलै बिफा
नोँ आंखौ बांद्रायसो बुंबाय
-
बिमाया मोजांब्ला
फिसाया मानो गाज्रि?
दाव दाव बांद्राय अन्नायावनो जादोँ
-
सि सि लाजिगैयैया
बिड़ि सिगारेड्खौ सोर सोबो
सादा थांखुखौ सोर जायो
जौखौ नोँसो लोङो
जुवाखौ नोँसो गेलेदोँ
नोँनिनो सोलोँदोँ बियो
बिफाया मोजांब्ला फिसाया मानो गाज्रि?
-
ओइ बांद्राय बुंबाय नोँ बिमा
सिरिथा सिरिथानोँ
फिसाखौ सामलायनांगौ नोँसो
-
फिसानि इयुनखौ लुबैयोब्ला
नोङो दाबो मानो खोमसि?
रग' रग' सालि
आं आजावगोन गासैखौबो
नाथाय मिथिखा आंबो आंसो।