बोहैनाय आंनि थैयाव बैदासि Poem by Ronjoy Brahma

बैग्रि बिफांआव गाखोना
सिरि मोनहां मोनहां
गोलावयै उन्दाना दंमोन आं
दै गाङा ओँखाम उखैया
.
जरा जरा दाउलुर
थेबथेफारि बायदि दाउसिन
आंनि मोखां सेरावनो
मोसाफैयो खुदुमलायफैयो
बिरलाङो बाफैयो खनले खनले
.
दिनैनि बिबार बारियाव
दिनैनि गोसो होनाय
गोसो लालायनायफोरा
बिबारनि आबाहावाखौ गुबुंले खालामो
.
थेवबो निजोरा रानाखै
हाजोआ जेसेबांखि गोरान जालाङा
गोगो गोगो होननाय
बे दैसाजोँनो गोजावलांदोँ-
.
दैसा सेरनि मन्दिर
नमा नसाखौ हाद्रि खालामनानै
जेराव दंमोन जिउ मोनसे
आं आंनि अनजालिनि-
.
बायखोन्दा बै मन्दिरनि
निजोम मारुंआव जनानै
जोमै नायदाव नायदाव
सिफुं सुयो आंनि गोरबो