मा लुबैबावो मानसिया? Poem by Ronjoy Brahma

हाजोनि अन्थाइ दन्दर दन्दर
मै मोसानि बिगुर गान्नानै
बोसोरनि उनाव बोसोर
बेसेबा खुसिमोन मानसिया
-
अर दिहुन्नो रोँनायनिफ्राय
लाजिनो रोँनायनिफ्रायनो
एखुथा संसार फाथिनो रोँनायनिफ्राय
दिनै मानसिया गोबां सोलोँबावो
-
आहाम बोराय
आहाम बुरैनि उनाव
मानसि मेलेमनि सान्थ्र हायै जिब
अब्लाबो दावहानि रादाब जेरैबो
-
खौसे जाबायब्लाबो
खौसे जानो हायाखिसै जोँ
सोमखोर मिथिँगाबादि
-
खौसे खालामनो हायाखिसै
बेद बायबेल
आरो गीतायाबो
-
आरोबाव जोनोम जाबाय
कराण पुराण गोबां थिउरिनि
गोबां गोबां फोथार
दावहाथिलि रंजासालिनि सिङावनो
-
मानसिया मा जुनार?
मोस्रोमजोँ मोस्रोम अनलायोब्लाबो
मानसिजोँ मानसि गोरोबथारा
दावहानिल' सिमां नुयो बिसोर
-
मानसिनि एसे गियानजोँ
सैमाफोरा अरलायो
मोसौफोरा सौलायो
बिसोरनिफ्रायबो सोलोँबाय मानसिया