सिख्रि सिख्ला: मोसा आरो जाम्बा असुर Poem by Ronjoy Brahma

मोसानि बासायाव एब्रेनानै दुब दुब हमथा जायै
बिखा मावलायनाय मेंदोँ जाम्बा असुरा,
बिनि मेँनायनि गिरुबारु सोदोबखौ खोनानानै
खारनो हमबाय सालबारिनि गासै जिउ जुनारफ्रा।
बिफां थिखिनियाव नाङागोदै जनानै मुलुगखौ नायहरनाय
सनालु आरो मोख्रा जाथिफ्राबो बाज्रुमना खारबाय,
मै मैदेर सेसा आरो गोबां
बे अरननि जुनारफ्रानो लामफैथा खारनो हमबाय।
अरननि सानख'हायै दाउसिनफ्राबो जेसे हागौ एसे
गांखं सिबनानै थोर्फो मोनथाम जोमै बारलांबाय,
बेबादिखौ नुनानै जाम्बा असुरा
आरोबाव गोख्रैसिन मेँनायनि सोदोब होनो हमबाय।
होनबा सैमा सियालफ्रा आरोबाव
लानजाइ थिखोना मावरिया हाजोनि थिखिनि मोनहैबाय,
बयबो फाफोर नांनानै जेरै हागौ एरै खारननायावनो
मासे खुसुं बोराया मैदेरजोँ,
हान्थुसे गौथौ गासोना गालांजाबाय
बेयावनो बियो सिरि थाबाय।
बिफांनि दालाइयाव दुमा दुमा बानानै थानाय
बेरे बेरेमाफ्राबो सानजा सोनाब अंअं बिरलांनो हमबाय,
बेबादिखौ नुनानै मोसा राजाया सोमो नांनायसै
जोबोद रागाबो जोँनो हमनायसै।
बेबादि उनाव बियो रागाजोँ
जाम्बा असुरनि माथोखौ खोनानानै खाथियाव सहैनायसै,
गोगोम गारांजोँ बियो सोँनायसै-
ओइ बाहाय नोँ सोरनि फिसा?
नोङो आंखौ सिनायदोँना आंखौ सिनायदोँ?
होनबा जाम्बा असुरा बुंफिन्नायसै-
नै नोँथां आंनि बुदिया एसेबां जौखोन्दो आवग्रिखो नुबायथ'?
अरननि खारनाय जुनारनि अनजिमाखौ सानब्लाबो
सिबाय फिन्नाय होनो हालिया नोङो।
मोसाया थिखिनियाव दावखोना सोँनायसै-
नोँनि मुङा मा मुं बुंनायसाय?
आरो नोङो सोरनि फिसाज्ला?
बेबादि होन्नानै मोसाया गोम थानायसै।
जाम्बा असुर जाम्बा मोदायनि फिसा
ओइ बाहाय नोँनि बिखुं जोबोद स्लिम स्लिम,
बेबादि होन्नानै मोसानि बिखुंआव फिउ बारखोनायसै जाम्बा असुरा
लोगो लोगो मोसा बोरायाबो लानजाइ थिखोना फेख्रायनायसै।
जाम्बा असुरा बिनि जानजियाव गोरानिफ्राय गोरासिन
थेथे हमथा हमथा थायासै,
मोसाया गाबख्रावना खारै खारै उनाव
आज्लं बिलोआव जामफाव बाज्रुमनासै।