दाबो आंखौ मुगैयो Poem by Bahadur Basumatary

बिसोर दाबो आंखौ मुगैयो।

आं थाबायनाय लामायाव
स्रां-स्रां लामा नागिरनायाव
दाबोथ' आंहा हेँथा दं।
दाबोथ' आंहा उदांस्रि गैया।
मैया आरो दिनैबो
सहरनि मानसिफ्रा आंखौ मुगैयो,
लामानि मानसिफ्रा खिबु फैला फैला
आंखौ लजिफोनाङो।

मैया आं दिल्लियाव थांदोँमोन।
संबिजिदलायखौ लानानै
मोनथायखौ संसदाव बुंहैदोँमोन।
नाथाय बामुनफ्रा आंखौ बुंदोंमोन,
आंहालायनो बैसो जायाखै।
गोबाव सम नेनांगोन।
बाजि बोसोरनि उनावसो गनायगोन।
दाखालिबो आं आंनि हारिमुखौ
राजथावनियाव दिनथिहैदोँमोन।
नाथाय आं जाय हारिमुखौ गोरबोजों मोजांमोनो
खौथि सुबुंफ्रा आंखौ निन्दासो होदोँमोन।
बिसोर आंखौ बुदोंमोन
एम्फौ एनला जाग्रा असुर हारि।
सोदोमस्रि गैयै हारि।
आं मिथिगौ बे हादराव
आंहा गासैबो दंजोबो,
नाथाय बिसोर आंखौ समान नोजोरै नायया।
फिसा बाथुलबायदि
बिसोर आंनि मोनथायखौ आंनो होया।
बिसोर आंखौ उदाङै मावनो होया।
आंहा दाबो सिनायथि, उदांस्रि, समानथाय आरो बिजिरनायनि आंखाल।
मानोना बिसोर आंखौ ट्राइबेल बुहुत सानो।
बिसोर दाबो आंखौ मुगैयो।