नागिर मालाय बहा मोनबावनो Poem by Ronjoy Brahma

दिनै मानोबा मिथिया
उन्दैनि सावगारिया फैयो,
खालि गाबनाय
खालि मिनिनाय
दैस्लुं बायदि
गासैबो सावगारि
हुरा हुरा मानोबा
गोसो गोरबोआ जाखाङो।
बेसे गोदैमोन उन्दैनि
हब्रानाया
मोदै हुगार हुगार
आरो
दिखार गैयै दान्दिसे
बोहैनाय खावलायनि मोदै,
मैला जाफबनाय आखायजोँ
हुरा हुरा बिलिरना
गाबज्रिनाय
आयै...
आयै...
आयै...
आं गोसोआव दं
बिबार बायदि समायना
दैस्लुं बायदि रंजानायखौ,
अखाफोर गावदांआ
बेसेदि आंजोँ गेलेयोमोन,
जोँमा जारौआ आंखौ
बेसेदि रंजाखां होयोमोन,
दिनै
नाथाय
आं हाथासि
फेरलेबसे मिजिँआ
आरो जिउ मोनसेनि थांखिया
आंखौ मानोबा उन्दुनो होआ।
आंहा मानोबा गोजोन्नाय गैया
जेब्लाबो
अरायबो
दुखुआव
खालि सानस्रियाव,
हां मोनस'यै आगोराव
जेब्लाबो थब्ल'यो।
हाबाब बिबार बायदि
दैस्लुं बायदि
गोदै गारां
बबाव मोननो आं दा
बबाव मोननो...
उन्दै समादि आरोबाव
आरोबाव
बेयोदि फैनाय नंलिया।