फुर्णिमानि लामायावबो Poem by Ronjoy Brahma

फुर्णिमानि लामायावबो

Rating: 5.0

गुसु गोजोन हराव
सोरांसि सोरांसि समाव
आं मिजिँनि लामाखौ मोनहां मोनहां
-
अमाबस्या अम्बासि एकादसि
हांगार गोसोम खोमसि हरखौ
थाबायना लासैनो गारबोबाय आं
-
खुसिजोँ बुंफबनाय दिनै हरा फुर्णिमा
मिनि खुसि बाथ्रा सावरायना
दाउसिन दाउलाफ्रा उन्दुबाय
एम्फौ-एनला गांफौफोरा
अहाया अहाया दाबो रंजाबाय
बयनिबो गेजेर गेजेर आं
जोबोद रंजानाय मोनफुंगोननि
-
बैयो मा बेलाइ?
खांग्रांनानै गोजां बोथोराव
जाया जाया सिखारदोँ फिन गोग्लैफिनदोँ
खांग्रांलाय खुग्लुबलाय
-
बियो बुहुतसो नामा?
आखाय आथिँबो दंलाय माथो
थांहां फावसायहां जायो आं
थांथारब्ला देरहानाय नाथाय गियोब्ला
फिन फैफिनोब्ला?
-
आबौनि सोलेरा दाबो मोनामो
जेरबासे हाखरनिफ्राय सियाला बुरख'नाय
आयआ नुथारदोँनो
आयखौ सिगिखांबायनो बियो
-
हाव हाव दुंखांदोँ गोसोआ
गोजांस्रिउ गोजांस्रिउ मोनसिनदोँ देहाया
हाथाइ हाराव राव बारसिन फैब्ला?
-
गुमा एम्फौनि रैसुमै आं खहाबनाय
दैला खबामाबो
मानोबा आंनि गोसोखौ दाथां दाथां बुंदोँ
आथिँआव हमथादोँ आरो हमथादोँ
-
आंनि खोमा मेगन गियानजोँ
आं सिनायदोँ-
नै बेयो गोमोथिँ
नै बेयो ससमासो
नै बेयो गुमा एम्फौफोर
-
अखाफोरनि सोरांआव गय खान्थालखौ
सुमलि गाम्बारि दंफांखौ सिनायदोँ
बैग्रि बिफांखौ सिनायाखै आं अब्लाबो
बैग्रि बिफांखौनो सानफ्लांदोँ फाख्रिफां
बेयावथ' आरो बुहुत ओँखारो
-
थांहां फैहां बेयावनो थाबाय आं
आखायाव अन्थाइ थरसे
बुहुतनि मोदोमाव नांब्लानो गुब्रुनाय हाथर
थियारि रावबो फैनो हाया
जेन' जम राजायाबो गिनांगौसो
-
आं जेराव दं बेयावनो दं
नाथाय दाबो दाउज्ला गेसेरलिया
फेरेँगा दाउसिना सिरि मोनलिया
मुस्रि नांनाय मोखांआव साना ओँखारलिया
गोजां बोथोर थोर थोर गोजांदोँ।

Wednesday, October 28, 2015
Topic(s) of this poem: night
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success