फुजा मेलानि झान्दि मुन्दायाव
आवसारि जानाय बापुजी गान्धीनि सावगारिया
आबगारिनि अफ्रि दोआव दानदिसे गोजोमदोंमोन
हाथायाव ना अमा बेदर बायदिसिनानि थै सोलादोंमोन
बियो आंनि सिफिनिफ्राइ
ओंखार लांनानै आंनो जिलाफि जाहोदोंमोन
साहा गरथसे फिथा गुरसे बायदिसिना सानथ्रहायै खाजा........!
बियो आंनो गानग्रा जोमग्रा लाबोदोंमोन
नाथाय बे आखुखौनो दाबो सोलाया बियो
बियो खारथिंबायो ओजों हजों
देहा फालांगिरिजों बामजायो
राजखान्थिगिरि, मार्डारार दौ थाला सोर्गो मोर्थो बयजोंबो सिनायजायो
खानाफोराबो बिनि थाखायनो दा खाना नंलिया
नाथाय खाना नङैबाबो खाना जाफ्लायो बिनि थाखाय
लेंग्राफोराबो लेंग्रा नंलिया बिनि थाखाय बबायाबो बबा नंलिया
नाथाय लेंग्राबो जाफ्लायो बबाबो जाफ्लायो बिनि थाखाय
किडनि नांगौ किडनि होफैनो हागौ बियो
मेगन नांगौ मेगन होफैनो हायो बियो
आह! आं नोंखौ बाखोनायो
हादोरखौ बेबादिनो दिथा होदों नों
एखमबा उरां जाहाजजों
एखमबा मथर थेला मोसौगारि……!
बाङासिङा रोगाग्रा, खान्थाल गोमोन बेफारि
नाथुर गोरान बेफारिनि जलंगा जलंगा थानानै
नों जोंनि गामि आरो समाजखौ साबखांहोदों
दाहोना नांगौ दाहोना रुवाथि नांगौ रुवाथि मोनहोदों
गुन्दा नांगौ होनबा गुन्दाबो लानानै फैदों नोंनो
आरो माथो बुंबावनो आंलाइ......!
बाखोनायाबो थानो हाया आं
नोंदि बोलिनि थाखाय लाबोयो बोरमा गोसोम
खानानि खुरैयाव दलर जिरायना ओंखाम जानायनि सिगांआवनो उदै बुंहोयो
नोंनि थाखायनो फाख्रि बिफांआ सोरांबानो मोनजायो आफेल फिथाइ
गोदै-गोथाव धुब -धुना आगर बाथिनि मोदोमनाय
जिगाबनि मुर्थिफोराबो
थिग रोखोमैनो प्रसादनि मोखां नुनो मोनदों
बाखोनायाबानो थानो हाया आं
गामाखालिनि बादिनो दिनैबो नों
अनसाय जाबोदों मान मोनबाय थादों
बुंनो थाङोब्ला बांसिननिफ्राइ बांसिनसो अनसाय जादों
This poem has not been translated into any other language yet.
I would like to translate this poem