दिनैनि हराव नांगोलनि जांख्रा Poem by Ronjoy Brahma

थाखोमानो हायै सोरां
दिनैनि फुर्णिमा हराव
थाखोमानो जायगा मोनाखै सुबुंङा
सुथुरनि मेगन नोजोरनिफ्राय,
हालाय-हाफाय नागिरदोँ अरन
मिथिया गावजोँगाव थैनि हासार होदोँ
रानस्राव मिथिँगायाव ।
खर' सुबाव ग' ग' फेसाया
आंनि उन्दुनायखौ फोजादोँ-
हायाखिसै आं उन्दुफिन्नो
मेगन मोसेबथाबना ।
हां थिफुं थिफुं सेफ' सेफ'
सोरनिबा सोदोब उसुं खनायाव
आरोबाव आंखौ बिखा सोमावदोँ!
गोदो गोदो उन्दुलांनाय सैमा बोथाया
हां हां सोँख्रावदोँ
खुगा सिब्लां सिब्लां
नाथाय-
खारफिन नांदोँ ।
मिथिया सुथुरा थिवरिया
खिबु उनाव
होसो होसो सिलाइजोँ गावफैदोँ
आरोबाव सोदोब आंनि बिख्लोआव हमना बोदोँ ।
दैज्लांनि नांगोल जांख्रा
हाब्रु सारनाय बायदि
होसो होसो सारफाव फैदोँ
खारग्लुंदोँ आंनि उसुं सेयाव
बोहैदोँ आंनि सिलाजोँ
गोजा थैनि बाना
दिग गैयै जेरैबो लामा जाम्फै ।