हनै हनै जोमैया खारदोँ Poem by Ronjoy Brahma

हनै हनै जोमैया खारदोँ

Rating: 5.0

जोँनि गोसो आरो मोखांनि आबहावाया
आरोबाव गुबुंले जासिनबाय,
मिनिनाय आरो खुद्रिनायनि गुबुंनाया
आरोबाव सहायजायै हाद्रि जाबाय।
अनजालि गंसे थावख्रिजोँनो जोँ गिदिँनाय मोनब्ला
समायना जाथारगौमोन मोनसे जिउआ,
दा गिदिँफायो नोँ गोदान गोदान साखाजोँ
बेयावनो हाद्रि जायो जोँनि सिमांआ।
दिनै नोँखौ लोगो मोनब्ला
आंनि गोरबोआबो आवबा जायो,
बुंनो बुंनो सान्नाया जिउनि बाथ्राया
नोँजोँ आंजोँ मोनसे दैसानि फाराव।
आं नोँनो हिमालय हाजोनि थिखिनिखौ
आसि थुयै थुयै दिन्थिहरो,
आसि थुहरो फुरसब जोमै गोबानाय अख्रां
दाउराइ आगरनि सोमखोर अख्रांखौ।
थेवबो अख्रांनि सुफुंगासे जोमैखौ
लामा नायै नायै गोसोआसो बुङो-
हनै हनै जोमैया खारदोँ
नोँनि आरो आंनि बुहुमनि गेजेराव।
अनजालि नोँ राजिदा दुगैनो
जुब जुब हानाय अखायाव?
बारदैसिख्ला जानानै गोदान आबहावा सोरजिनो
समायना बैसागुखौ बरायना लाबोनो?

Monday, March 30, 2015
Topic(s) of this poem: poem
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success