गुस्थिया मोसाथारगोन Poem by Ronjoy Brahma

गोसोनि बाथ्राया गोसोआवनो जमा जायो
आं नाथाय सहायनो हायाखै,
नोँखौ नुग्रोमोना आंनि गुस्थिया
मोसाथारगोन खि मोसाथारगोन।
बुब्लिनि जेयाव नांथानाय खबामफ्रा
एबा बोरसिया हायनानै लानाय सोदोबा
थामहिनबा रोजाबो मेथाइ,
आसिननि गुथाल, अन्थाइनि अरखिबादि।
बिदै सेरेबनि मोदोमनायखौ
होथेनानै दोनो लाइमोन गलाबा,
अनजालि बिखा गाग्लोबग्रा आंनि
सेरेबनि दुगानायखौ गाफ्लेनो हानायमोनब्ला?
बैसोमुथिनि मोखांआव आं नुयो
सैथानखौ सिबिग्रायानो घोरोमखौ दैदेनबाय,
नंखाय बुंग्रायानो बुहुमखौ फिदिँङो
बारनि गुस्थियाव आं नुयो।
दावहारु, थैजोँ बिमानि दाहार सुखग्रा
बिसम्बिया आंनि मेगनाव गाबो,
आं मा खालामनांगौ?
अदेबानि लाइमोन बिबारा गाफ्ले जाब्लाबो मोदोमो।
आंनि एखुथियाआ बेखौनो सानो
नारानाथा बुब्लिजोँ खमलायनानै,
बुब्लिया लांनो नागिरो खोमसि ओँथियाव!
दा आथिँखौ खेबसे बोथ्रोदनायनि सम।
लाइमोन बिबारनि गुस्थिया मोसाथारगोन
बिदिन्थायाव गाफ्ले जाब्लाबो,
मोदोमनाय बैसोमुथिनि देहायाव सारफावगोन,
सैथो गाफ्लेग्राया आरो बेसे गोबाव थांनाथानो?