बर'नि दाहा Poem by Bidindra Basumatary

गोबाव सम बारलांबाय
गोर्बोनि दाहाखौ सुख'नो
सिमां सुजुनाय बिफानि
मोखथां महर होनो
मिजिंनि खिलिनाय रावफोरखौ लाना,
होसोदोंमोन आबुं जांख्रिथाइनि लामायाव।
दुखुमोननाय हारिनि रानस्राव गोर्बोखौ
सिदोब खालामनो।
दिनै बेसेबा बोसोर बारलांबाय
बे सिमांखौनो मोखथां होसोनाय,
दुखारु, अनारु, बिबारि, मोनबारि
हंला, दाबास्रि मोननि
आलाइ सिलाइ थानायखौ
रुबायरु मोदै हुगारनायखौ
गैया खालामनो।
नाथाइ दिनै-
बर'नि दाहाया
जोबनो थाङा,
नास'यनाय, गादबनाय, सोबख'नाय
आय' दिनैबो बर'आ उदां नङा।