गोरबो इसिँनिफ्राइ- 170 Poem by Ronjoy Brahma

जिउ मिनि खुसि मुलुगनि
नोङो दंनाय-गैयै रायजोनि
बे लामाजोँ रजे नोँ फैयो
नोँनि खुसिजोँनो आं थाबायो
लेर लेर जिउनि मिजिँ रुजुन्नानै
-
बावबाय आङो रजे बावबाय
नोँखौ नुनानै आङो गोमोबाय
थेवबो नोँनि मिनिसुलु मिनिनायखौ
गोरबो सुफुं सुफुं आं बोनथुमदोँ
-
मिथिगौना रजे जिउ आंनि
नोँनि आगानजोँ गोदानै
आङो जारिमिन सुजुदोँ
गावनि गोरबोआव मानसावगारि बोनानै
-
रजे नोँनि फैनायखौ
दिनै सानै सानै दाजाबदोँ आं
साननि उनाव सान हिसाबजोँ
रजे नोँ फै सोरांखौ लानानै
-
नोँनि गियानजोँनो नुयो आङो दै
बिनि सेर सेर बिबार महरनि बारि
खोल खोल गोजोँ गोगो गोथार
बिनि सिं सिं हालि हालि जिउनां
-
नोँनि सोरांजोँ नुयो आं रजे
रुमबां रुमबां मिथिँगानि बायदि बिफां
दाउसिन-दाउला सोमखोर बिफां-बेन्दोँआव
हाजो हायेन गुवार फैलाव
गोजौ-गाहाय बेसेबा समायना मुलुग
-
नोँ फै रजे निहोर सारै सारै
नोँ फै अखा सास्रि सास्रि
मिथिँगानि महर मुस्रि बिलिरनानै
दैमा-दैसा बोहैहोनानै जुग जुग
-
जिउ दान्दिसे रंजानाय होनानै
गोरबो गाबनाय होनानै नोङो
हे लोगो आंखौबो लानानै थां नोङो
नोँ फैनाय लामाजोँ आगानखौ होनानै
नोँनि थांनाय लामाजोँ खेबसे।
-
29/12/2015
गामियाव