निनिमा (21) : बबे समाव मा जाया Poem by Ronjoy Brahma

बबे समाव मा जाया
बारा गोसोआवबो गैलिया।
थेवबो बबेबा बबेबा समाव जानाय
जाथायफोरखौ समाव रोमै रोमै
आं गोसोखांफ्लांबाय थायो।
दिनैबो मोननैसो जाथायफ्रा
गोसोआव गोजावगासिनो दं।
बुंनो थांब्ला आंनि जोनोमगिरि आय आफानि
गोख्रोँ दिथा सांग्रांथि होनायावनो
आं दिनै जाफुंसारनो हादोँ।'
दसे सिरि थाद'नानै बुंबावो मिथिँगाया-
' आंनि आय आरो आफाया
बराद जाखांहोग्रा सोरजिगिरि महरै
आंनि जोनोम मोनसे बे बुहुमाव।'
' नंगौ नोँनि आय आफाया
आंनि गोथार बिजिरनायाव
सैथोनि मेगन होगिरि इसोरबादि।
बियो थारैनो सैथो जोनोमगिरि।'
' आंनि उन्दै समनि मोन्नैसो जाथाय।
आंनि आय आफायानो बुंनायबादिब्ला
आं उन्दै समाव जोबोर अलसिया आरो जोबोर बायगरमोन।
जेब्ला बे गामियाव गुबुन हारिनि
सिनाय मोनै सुबुंफोरा हाबफैयो अब्ला
जोँ लान्थि लुन्थि गथ'मोन।
मिथिस'हाया आं,
जेब्ला गामिनि गंसे गुदि फरायसालियाव फरायो अब्ला
आंनो आय आरो आफाया
गंसे मोजां सिलर,
गंसे मोजां पिन्सिल बायना होनो हायामोन।
बे आंखालखौ सुफुंनो थाखाय लोगोफोरनि पिन्सिलखौ सिखावै
लाखोमानाय खावखोमानाय हुदाया
गाज्रियै आंनियाव दंमोन।
आंहा गोसोआव दं,
गोसोआव फैयो आंहा-
जेब्ला थाखोनैआव फरायो अब्ला
आं सासे लोगोनि पिन्सिलखौ लाखोमानानै बुजानाय
आरो फरायसालिया जोबजासे हान्थु खरायनांनायखौ।
बे दिननिफ्राय आं रावनिबो जिराद खावाखै
रावनिबो मुवा लाखोमानाबो गोसो जाबोआखै।
बे बारनिफ्राय आं सिलर,
पिन्सिल गैयाब्ला फरायसालियाव थाङा,
बेनि उनावबो मोन्नैसो जाथायखौ
आं दिनैबो गोसोआव दं।
जेब्ला थाखो ब्रैआव फरायो अब्ला
न'नि बिमा बिफाजोँ
खामानि दामानियाव मदद होआलाबानो
हाग्रा-बंग्रा दाउसिन गावनाय
बेरायबायनाय आरो माब्लाबा
जोँ बांगालफोरनि दाउ हांसो गावथारनाय
बेफोर आखलफोरखौ नुनानै आय आफाया
सानसेखालि ओँखाम जानाय समाव दोखो दोखो बुयो।
बे समनिफ्राय आं दाउ गावबायनाय,
हाग्रा बंग्रा थाबायथिँनाय हुदाखौ गोख्रैनो गारो।
आय आफाजोँ खामानियाव मदद होयो।
बेबादिनो थोब्ले माब्ले आय आफानि
दुखुआव अरायबो सिरि सिरि दुखु,
सुखुआव सुखु मिनि रंजा समाव रंजाबोदोँ।
फिसाफोरनि मोजां इयुनखौ जेब्लाबो
आय आफाया हास्थायो।
मानसि गिदिरनि सायाव आय आफाया
गोथार गोसोजोँ सिबिनाय दं।
बेबादिनो बबेबा गामियाव एबा
बबेबा ओनसोलाव मानसि गिदिर नङाबा
बबेबा आफादनि दैदेनगिरिमोन फैनायनि खौरां मोनब्ला
नायनो खोनासंनो गामसा सारामाय
खिथेबनोबो नागारथारा बियो।
गोसो गुदुंङै साथा खेंखाय दैबायो।
गेजेर आरो गोजौ फरायसालियाव
फरायनाय समाव गुरुदेब कालिचरण ब्रह्म,
गान्घी, यीशु कृष्टमोननि सानस्रिया
आंनि गोरबोआव जायगा लादोँमोन।
गोसो बोलो होथाबनानै नाजानायावनो
आं सानसे गोजौ फरायसालिनि जोबथा आनजाद
मेट्रिकखौ सेथि थाखोआव उथ्रियो।
बेनि उनावबो खष्ट मष्टयै
थोब्ले माब्लेजोँ कलेज हष्टेलाव थानानैनो
फरायबोनानै दिनै आं बिगियानाव
एम एस सि जानो हाबाय।'
' बाखोनायथाव मिथिँगा।
नोँथांनि जिउनि सुंद' जारिमिनानो
दानि फरायसाफोरनो
थोजासे थांखिसिम सौहैनो थुलुंगा होगोन।'
' आंनि जारिमिना मानो सार?
जोँ गेदेमा मानसिनि सानस्रि,
आरो गोथार गोरबोनि सान्थौफोरखौसो
बोला बोला दिन्थिनो हानायासो आबुं जागोन।'
सेकेण्ड मोनबासो सिरि थाहाबो मिथिँगाया
आरो माबा सान्ना बियो बुङो-
' गय जायामोन नामा सार? '
' ओहो,
आंहा गय जानायनि हुदा गैया।'
' जोबोद मोजां सार'
बे समावनो सोमखोरा देलायै
गुबुन गाननाय जोमनायजोँ
समायना साजायना ओँखार बोयो।
बिनि उन उन निनिमाया
साहा खाबब्रैसो लाना फैयो।
बियो सुखुरामनि सेराव थानाय
आलांगि थुलनि सायाव दोनना बुङो-
' लोँदो सार साहाया,
जेबो गैया जाबाय।'
' जागोन'
निनिमाया जेबो बुङासै,
गासैबो साहा लोँलायो आरो
दसे उनाव सुखुरामा
ज'नायनिफ्राय सिखारना मिथिँगाखौ बुङो-
' माब्ला गिदिँफिनगोन? '
मिथिँगाया फिनखौ होयो-
' दिनैनो मोनाबिलियाव'
' बिदिब्ला थाथ'दो,
जोँहा गोबां खामानि दं।'
' दे जागोन सार'
-
मोनाबिलिनि जानाय आदारखौ जानानै
मिथिँगा आरो जिथिनाया
कक्राझार फारसे मोखां जाफिन्नो आवगायबाय।
मिथिँगा आरो जिथिना सानैबो
निनिमाखौ खुलुमस्राङो आरो
हांमानो गोरबोनि अननाय होयो।
माखासे पलिटिननि जलंगायाव
नांनाय मुवाफोर लानानै गाड़ी फारसे आवगायो।
गाड़ीया फुंनिफ्रायनो सानफा थारला
गोसा सान्दुंआव सिलायावनो गसंना थायो।
जाउनाव साननि दुंनायजोँ दासो एसे
गोजोन गुसु सुग्लायनो हमदोँ।
गाड़ीयाव हाबनानै मिथिँगाया स्टार होयो,
थिक समावनो सोमखोराबो बायजोनिफ्राय न'जोँ हाबबोयो।
सिलायाव सौफैथारना गाड़ीखौ बन्द खालामो।
मिथिँगाया ओँखारफिन्ना रायदावो-
' थांनोसै आदा थाथ'दो'
' अ' दे फंबाय दे'
मिथिँगाया सोमखोरखौ खुलुमो,
लोगोसे खुसियैनो जिथिनायाबो खुलुमो।
बियो बुङो-
' थाथ'दो आदा'
मिथिँगाया गाड़ीयाव हाबफिनो आरो
फारसेजोँ जिथिनायाबो हाबो।
दसे उनाव सोदोब होनानै गाड़ीया
ओँखारलांना हुर थाङो।
सोमखोर, निनिमा आरो हांमाया बिसोरखौ
गल' नायहरो-
गाड़ीनि गोजोँ जोँनाय सोरांआ फैसालियाव
आन्दोनिफ्राय आन्दोसिम गोमोरलांनायसिम।
-
ओँखाम संग्रा न'नि दरजाया फांनाय।
निनिमाया दरजाखौ खेंङो
बियो गंसे लाइट फोजोँना होयो।
सोमखोरा उन्दुग्रा खथायाव हाबना गाननाय जोमनाय सिफोरखौ सोलायो।
गांसे गामसा गानना बियो
बायजोआव सियार लाना जिरायो।
दसे उनावनो जानाय लोँनायनि थाम थिम
जानायाव निनिमाया बुंहरो-
' ओँखाम जाफैदो'
सोमखोरा जिरायनायनिफ्राय सिखारो
बियो ओँखाम संग्रा खथायाव हाबो।
मेँनाय मोननायलाय
बियो जेबो रायज्लायाखिसै,
बियो सिरि सिरियैनो जाबाय।
ओँख्रिया गोथावानो जादोँमोन,
दाउजोँ जोगोनाद, दालि जहल।
गोसो होहाबना जाबाय बियो,
दान्दिसे उनाव जाखांबाय।
जाखांनानानै उन्दुग्रा खथायाव हाबहैबाय।
बियो उन्दुग्रा एमावनो जिरायबाय,
बिनि उनाव सियाराव जिरायना,
गावनि दाइरियाव रेबगननि दागो फोनाङो।