आयै नोँ आंनि 38-87 Poem by Ronjoy Brahma

38.
गाबनाय हब्रानाय नेरनाय समाव
नोङो आंखौ गोजोन होयो
आयै नोँ आंखौ बिलिरना लायो
39.
मुखुब खामानियाव
नांथाबनानै
मिथिगौ आयै बयबो-
नोङो बेसेन गोसा समजोँ खारफायो
40.
बिलिर बिलिर गाबख्रिँ गथायनानै
फुथुयो नोँ जलंगा-
हेँआव गोजोन आंखौ
41.
आयै आंनि जोनोमगिरि
अननाय बामखांनायजोँ उखैनाय समाव जाहोयो
42.
गावनि बिलिर आखायजोँ
नोङो ओंखाम गुदुं
सिफ्लेनानै
दौवो आंनो आयै-
खुगानि गुसु बारजोँ
सुफुं सुफुं
43.
आयै आंनि अनसुलि बिमा
दुंहाव गोलोमनाय समाव
बोहैनाय खाफालनि निजोराखौ
मेँनाय उह आहा सोदोबजोँ
फुगारस्राङो गोलोमदै
दखना रोबैजोँ-
44.
गोजोन होयो नोँ आयै
सोलेरखौ
गय दनायखंनि गिसिब सिबलानानै
45.
जिउ नोँनो होदोँ आयै-
नोँनो आंनि गोजोन होग्रा
अनसुलि बिमा जिउनि-
46.
नोङो बुं आयै
आंनि अनसुलि-
माबोला आं गिदिर जाबावगोन-
47.
बुं आयै नोँ-
माबोला लेखा फरा
सोलोँनो मोनबावगोन?
48.
बावाखै आयै दाबोनो
बै सावगारि-
रायज्लायस्लिँनो रोँनाय
बिबार बायदि गोसोआ
49.
नोँनि मोदोम बुज्राव बुज्राव
गारमा रिँखावनाय हब्रानायखौ-
आयै आं स्कुलाव थांनो-
50.
आयै आं मानसि गिदिर जानो
रैसुमै गारां आयै नोँनि
आं बोरै बावनो बुरखायनाखौ?
51.
देरगोन आफा देरगोन
आब'मोन बायदि
आदामोन बायदि नोँ
गिदिर जागोन
52.
आयै आंनि राहागिरि
नोँ आंनो होयो-
जेब्लाबो गोजोन साया
नोँनि बिखुंआव आं उन्दुलाङो
53.
आयै नोँ आंनि अनसुलि
हाबाब आयै जोनोमनि
गोथार बिमा आंनि-
54.
बेन बेन दैज्लांनि दुब्लि हाब्रुआव
दखना बोखोस्रो खानाय खाथबनानै
थाङो आयै नोङो-
55.
अनसुला मोदायनो
उखैनाय सुफुंनो
ओँखाम थफ्ला हैनो
दै गरथसे गांगा होनो
56.
दङ आयै आंबो नोँनिनो बिखुंआव मिनिस्लुयै
फैलाव मायनि दुब्लिखौ
आयथिँ सोमाव सोमाव नायनानै
57.
आयै नोँ जिउनि
आंनि गोथार जोनोमगिरि
बावनो बबे जोनोमाव-
58.
दैज्लांनि अखा बार सिबलानायजोँ
जोदोमनाय बनजोँ उखुन्दै खुग्लुंनाय
फोमोनो नोँ आयै
उखैनाय सुफुंनो उदै
59.
मेगन आलौनाय उखुन्दैनि गेजेराव
खुगानि बारजोँ अरखियाव
जोँब्लाव होनानै-
60.
बे नोँनि गोहोआ
जोबोद गोमोथाव आयै
नोँनि बिखायाव आं आलो आलो उन्दुलाङो-
61.
आयै नोँ आंनि अरायनि
हाया आं थानो दसे नुआब्लानो
हरखाब हब्रा हब्रा गाबो आं आयै
62.
नोँ आंनि मेगननि फैसालियाव-
आन्दोयै थायोब्ला
आयै नोँ आंनो आंगोनि-
63.
मोन्दांथि आरो सानस्रिनि लैथोआव
नोँ नागिरै गोग्रोमदोँ आयै
इयुननि गोथार मिजिँ
64.
जिउनि मोन्दांथि गोरबोजोँ
इयुननि गोगो आरो-
गोथार गोदै फिथाइ
65.
बायगरै आं खारखोमा थाखोमा
न'नि उसुं खनायाव
आयै नोँ इयुननि
मिजिँगिरि
66.
गावनि असे फिसाखौ
जाम्बा खालामनो माबोरै?
होसो होसो बुरखायो
67.
बेबादिनो नोङो आयै
दोनना फैयो फरायसालियाव
इयुननि सिमां दं नोँहा
68.
आयै नोँ बेसे इयुन
मिजिँगिरि
हाया हांखो सिनायाब्लाबो
हायो आयै नोँ बिजाबनि
सेराव फजनो
69.
आयै नोँ हास्थायो इयुनाव गोजोन देरा
मिनि मिनिस्लुयै नायनो-
समायना जोँनाय हाथर्खि
70.
आयै आंनि दैथिँगिरि
जोँनाय गैयै अखोरांआव नायदावनानै
फोजोङो आयै नोँ गंसे साथि
71.
अखाफोर ज'हाबनाय खोमसि हराव
गैयाब्लाबो बाथि फोजोँनो बेसेन
फोजोङो आयै नोँ
गय दनायखंनि अर
72.
आयै आंनि मेगन बेखेवगिरि
दैज्लांनि गिलुं सिगिनाय बानायाव
बोखोना थाबायनो हायै फेनखौ
फिसिना बानाय महराव
न'आव फैफिनो
73.
आयै आंनि राहागिरि
बुरखायै बुदबै लाना थांफिनो
गोथौ लोमलानाय बानानि बिखुंजोँ
आयै नोँ आंनि दिङा महरै
74.
बिखुंङाव लानानै
दोनहैयो सोलोँथाइ गुदि फरायसालियाव
आयै आंनि अनसुलि बिमा
75.
लोगोनि लाखोमा खावखोमा
बायगर दुष्टनि थाखाय
मोनो साजा फोरोँगिरिनि सेवारिजोँ
76.
आयै आंनि अनसुलि नोँ
बिलिर बुरखायै बुरखायै
गोबाना लायो खुसियै
77.
आयै नोँ आंनि-
नोँनि अननायजोँ आं सानसे
नोँनि रावजोँ आं
हांखो सिनायो
78.
आयै आंनि आंगो
जोनोमनि जिउ बिमा
नोङो
नोँनो आंनि मिजिँगिरि
79.
इयुननि गोदै मिजिँजोँ
मिथिँगानि महर गुस्लायनायजोँ
आयै नोँ जोमैबादि
रादाब लाबोदोँ
बोथोर आरो जुगनि सोलायनायाव
80.
नोँनि गोरबोआ दै बाज्रुमदोँ
आयै नोँ सानसुथिर समनि
साया हास्थायदोँ
81.
जेरावबो समनि जांख्रिखांनायाव
गावखौ बावसोमदोँ
आयै नुदोँ आंबो नोँखौ
गोलोमदै फसरनाय
82.
आयै नोँ रानथाब-खुथाब
गोरान दुब्लियाव गोलोमदै फिसिदोँ
अनसुला फिसायनि नांगोल मुथियाव
फुजा होदोँ
83.
लोगोसे आफाजोँ गोरान हायाव
बिदिन्थानि गोदान दाहाराव
देहाखौ मुखुब लाखिदोँ
84.
मिथिगौ आं आयै-
जाया जाया गोदान जोलैनि
आबाद मावदोँ
85.
आयै नोँहा गोरबो दं
गावनि आंगो फिसाखौ
गेरेमसा खालामनो
गोदान मिजिँनि बोलो लानानै
86.
सास्रिदोँ दै सान्ति
गोरान दुब्लियाव
आयै नोँ आंनि आबादारि
87.
लेँहरदोँ नोँ दिनै अखा
रानज्रिँ दुब्लियाव गोगो सास्रिनो
आयै नोँ आंनि गोजोन
अखानि थरथिँ-