अरननि दाइरि 5.02 खोला हालुराव रायखस Poem by Ronjoy Brahma

1003
जोबोद रागा जोँनानै सिखारफिन्ना
गोलेरा गावनि खुगाखौ फुवारना बुंबाय-
''ओइ बाहाय आंनि मोदोमाव आखाय दाहो
नुदोँना आंनि खुगाया बेसेबां गुवार?
1004
गोसो जायोब्ला आं अखाफोरखौ
हां खनसेयावनो ग्लब मन'नो हागौ,
नोँलाय आरो उन्दै सासे रायखससो
आंनि लानजाइ सिबगासेनो थांफानो हागौ।''
1005
अब्ला हाखो रायखसा जोबोद रागाजोँ
गोख्रैनो गोलेरखौ सौना होनायसै,
नाथाय बोलोगोरा गोलेरा बिखौ
गावनि लानजाइजोँनो जाथे गारबाय।
1006
बिनि उनाव बिसोरो बालाबारियाव
सानसे हरसे गिलुबालु बुलायनायसै,
लैथोमानि दाउसिन-दाउला आरो
गासै जिउआरिफ्रा बेँखन्ना नायफैबाय।
1007
मोनसे समाव गोलेरा हाखो रायखसखौ
ओरैबादि खुगा फुवारना होसोनायसैदि
होनबा रायखसा गोर गोर खारनानै
गिदिर अन्थाइ खन्ना बिनि खुगायाव गारसन्ना होनायसै।
1008
गोलेरा अन्थाइखौ ग्लब मन'फ्लांबाय
बियो उदैयाव लानानैनो मेमब्रायबाय,
रायखसा बिखा खुगा बोखावना फेजेन्नानै
जोबोद खुसिजोँ जिबिफोरखौ होसोना जानायसै।
1009
उदै बुंजासे जानानै बियो
बालाबारियाव उदै बिलिरना दुमफ्ला उन्दुनायसै,
खिबुआव खि लानानै जिउखौ रैखा खालामनाय
जिउआरिया गिहाबना गोबां सान थांबाय।
1010
जिउखौ लानानै गिहाबनाय जिउआरिफ्रा
बे साननिफ्रायनो फुंनि समाव
बोरियाव गाखोना रंजानायखौ नागारबाय
बिसोर अन्थाइ आरो हाखराव एब्रेबाय।
1011
दहमैनो बोसोरसे उन्दुलांदोँ हाखो रायखसा
लैथोमा सेराव गोदो गोदो,
लैथोमानि जिउआरिफ्रा बावहाबनानै
गिनाय गैयाजासे बिनि सेराव गेलेफिन्नायसै।
1012
खायसे दाउसिनफ्राय बिनि मोदोमाव बानानै
गोसो होसारना थेँथेँ मुसुरदावनो हमबाय,
बेबादिनो बोसोरसेनि बायदि सानफोरा बारलांबाय
बेफोरखौ जेबो उदिस मोनाखिसै रायखसा।
1013
सानसेखालि मासे जिबौआ फैनानै
बिनि गन्थंआव ख्लब हाबलाङो,
गोदो गोदो उन्दुलांनाय हाखो रायखसा
होनबासो बियो सिरि जाहाद मोनखाङो।
1014
बियो रागा जोँनानै हब्राखांनायसै
जिबौआ अब्ला गन्थंजोँ थल्थब गोग्लैना थैहाबनायसै,
फेँगुणमोना खिबुआव खि लानानै
लैथोमायाव खुन्थेँ हैनायसै।
1015
हांसो सिलारिफ्रा गांखं बायलायनाय
गांखं फुवारना अख्रांआव बिरदावनायसै,
होनबा हाखो रायखसा थरसे अन्थाइ खन्ना
जोबोद रागाजोँ खुबैना होनायसै।
1016
गुफुं हांसो सिलारि जरासेया
हायाव गोख्रैनो जल्दब गोग्लैनायसै,
बे साननिफ्रायनो हाखो रायखसा अख्रांआव
अन्थाइ खुबैना मोनजानायनि राहा खालामनायसै।
1017
बेबादिनो मोनसे समाव रायखसा
लैथोमानि जिउआरिखौ फोजोबनो हमबाय,
गावनो उनाव उखैनानै आला-खालायै
उदै सुथेना थानो गोनां जाबाय।
1018
सानसेखालि मोनसे फुर्णिमा हराव
अखाफोरखौ नुब्लासो बियो
सिरिथाखौ हरखाब गोसोखांनायसै
अब्ला बियो लैथोमाखौ बारनो नाजानायसै।
1019
बियो सोनाब हालुराव थांनो हानायनि
जेबो राहाखौ जेरैबो मोनाखिसै,
लैथोमानि सेरसेर सोनाब हालुराव
बियो थानो राहा लानायसै।
1020
सानसेखालि बियो मासे हांसोखौ
गावनि मेगनजोँ नुना होसोनायसै,
हांसो बेलाथिया नाथाय जोबोद गोख्रैयै
लैथोमायाव लोहाबना गोमोर लांबाय।
1021
लैथोमानि बोरायसिन हांसो बियो
गोबां बोसोरनि सिगांनिफ्रायनो
बियो गावनि खुसिजोँ रंजायो
जिउनि बायदि सानखौ बरायनानै।
1022
लैथोमानि जिउआरिफोरनि गेजेराव
अराय बियो जोबोद एखुथा,
गोसोनि खुसि आरो दुखुखौ गोबानानै
बियो लैथोनि नाफोरखौ जायो।
1023
बिखौ गिनानै नाफोरा खारो
बिनि आन्दो आन्दो थाखोमायो,
हांसो बेलाथिया होसोना जायो
बेबादिनो बियो गोख्रैनो दावो।
1024
रायखसा बिखौ आन्दायनायसै
बियो राहा खाना जानानै दुखुजोँ,
लैथोमा सेराव जसोना थाबाय
बियो खाफाल हमनानै सान बारहोबाय।