सानबोलाउरिनि रेगा-7 Poem by Bidindra Basumatary

जायोमोननो सिगां नैबेफोर दुब्लियावनो
ग्रौ ग्रौ माय आबाद बिदां गोलाउ
बाख्रि उसिलायनाय बैफोर सिगां समावसो।
-
दिनै मोनलिया मा जालांखो
बोसोरखौनो मोनहैफिनला माइ जोबनायानो
रसा नांसिगोनसो मोनलाय लांबाय-आबौआ बुंदों।
-
दैसा-दंगफोराव मोननो थांलिया साम' खांख्राय
गाखोलियानो दाना आबैनि जेखाइयाव नाथुर जुनाय।
सानसे गुरब्लाबो खबाइ थालोआनो लोमला दिनै।
-
सिगां मोनसोयोमोननो गुरगासेयावनो खबाय गोरनासे
साम खांख्राय आंखाल गैथारामोननो
सबाय मैथाजों थेब्रे जानायमोन उदै बिलिरना।
-
बुंसोलायो सोरबा सोरबा खोनाफा माफा
गोदोलायनो बर'नि बिग्रायारिफोरा नोगोद खामोननो
दाना माथो गावसोरसो जौ फाग्ला।
-
गामियाव जौ संनाय लोंनाय नुब्ला
गारहरो बुयोमोननो बर'नि बिग्रायारिफोरा
समाजनि मोजां नोजोरथिना: दिनै सोलायबाय बिथांमोनहा।