Babaeng Aliw Poem by Mark Atas

Babaeng Aliw

Isang gabing tahimik, sa gilid ng kalsada
Isang babaeng kay ganda, ang aking nakita

Gayak na gayak at humahalimuyak
Kumikinang ang perlas sa may leeg at tenga

Mapulang labi at pisngi
na pilit ngumingiti...

Kaagad kong nilapitan at aking nasulyapan
Babaeng aliw pala, ang nasa harapan

Sa di malamang dahilan, aking napagmasdan
Luha sa kanyang mata, agad niyang pinunasan

Isang munting angel ang sa kanya'y lumapit
At biglang yumakap ng napakahigpit

Sa gilid ng estero, sila ay nagsalo
Pansit na mainit, agad nilang isinubo

Aking nasaksihan ang tunay na dahilan
Na kahit kahihiyan ay pilit niyang lalabanan

Mapunan lamang panandalian
Ang kumakalam na tiyan

Para sa karamihan, sila ay dumi ng lipunan
Kinakalakal at binebenta ang laman

Hinuhusgahan at pinagtatabuyan
Ng mga taong, sinasabing may pinag aralan

COMMENTS OF THE POEM
READ THIS POEM IN OTHER LANGUAGES
Close
Error Success