Bathi Angibuyele Kwazulu Poem by senzokhaya umhayi

Bathi Angibuyele Kwazulu



Ngisemhlabeni ezwen' lama Zulu, ,
Ngiseyibhungu ngibhaklazw' isizungu,
Ngiye ngilibalekele elakithi ela kwaZulu,
Ngizijubil' ngashiy' ikhaya ngaya kowama bhunu,
Ngabashiya bekhala abakithi ngesi zungu,
Ngathath' uhambo ngabashiy' esinquthu,
Noma bekhala ngiyabezwa bandla,
Bath' angibuye kwa Zulu sizoyithungel' ebandla,

Sengiwele imifula nemigelezo ngagudla ulwandle,
Sengikude kwelathumb' obaba nokhokho,
Noma amathumb' ami ngawashiy' khon' emsamo kwagogo,
Ngizobuya naw' ugway' kagogo,
Ngisahloz' izihlahl' azikatheli
Nezulu lisomisile ngidlal' isomiso,
Ngisathol' amafec' okubamb' umoya,
Ngizobamb' umoya ngibadonse ku makhalekhukhwini,
Yebo ngizwile bayakhala ekhaya,
Bath' angibuye kwa Zulu,

Namanje ngisazulazula,
Ngisajomb' oJulius Nyerere street,
Ngiye ngehlele ko Anton Lembede street,
Ngisindwa imfumba yemiqingo wamapheph' emfundo yami,
Ngihamba ngiwabhosha njengenyoni ya macimbi,
Ngiphephethw' umoy' ngifund' amaphephandaba,
ELangeni ngimile ngifund' ilanga,
Kuze kubab' amehl' ngibhek' Isolezwe,
Luth' ehlweni kusal' ubhici,
Imiland' yemigcwab' igcwel' amakhasi,


Iminjunju phezu kwemicabango,
Ngiqamel' ezandlen' phezu komqamelo,
Izinyembezi nomjuluk' okugez' izandla zami,
Babeshil' injong' ithungel' ebandla,
Umsam' omnyam' ongenay' inhlanhla,
Amanz' amnyam' agelez' obondeni,
NakwaZulu ngiyabezw' abomndeni,

Bathi angibuyele ekhaya kwa Zulu.

By senzokhaya umhayi

COMMENTS OF THE POEM
Siyabonga A Nxumalo 23 August 2013

Ngiseyibhungu ngibhaklazw' isizungu.. kulomugqa lungisa lokhu, isizungu asishayi okuyigama elichazwa wuku 'bhaklaza'...kodwa isizungu siyamudla umuntu, izinduku sazo zizwiwa osuke endliwa yiso kodwa abanye abantu abaziboni. ngakho igama elithi ngiququdwa yisizungu lingena khaxa kulomusho, kanti negama umzwangedwa lihle likhombisa ukuceba kolimi lwethu, kunaleli elithi isizungu. khona ngiyaqonda ukuthi lona bewulifakela imvumelwano sigcino kulomusho. Ngiye ngilibalekele elakithi ela kwaZulu.. kulomusho u ela awunayo indawo, wukhipha kusale nje u kwaZulu. Ngihamba ngiwabhosha njengenyoni ya macimbi, lapha ke hlonipha kunokufaka ungiwabhosha umane uthi ngiwaqathaza okwenyoni yamacimbi. ngicela ukuma lapha, mhlawumbe uzobona sengathi ngizenza owazi kakhulu, kungenzeka lokhu kukuphathe kabi, uma kunjalo uyongixolela nsizwa yamabutho, ngenziwa wuthando lokubhala nenjabulo nelukuluku lokuthi ngelinye ilanga sikhiphe icwecwe ndawonye.. muhle umsebenzi wakho, ungabe usavilapha ke. Siya_! !

0 0 Reply
READ THIS POEM IN OTHER LANGUAGES
Close
Error Success