Chisingaperi Chinoshura Chinobhururuka Chinomhara… Poem by Munashe Rupazo

Chisingaperi chinoshura, chinobhururuka chinomhara
Natsa kwawabva, kwaunoenda husiku
Vakuru vakataura kare
Vacharamba vachitaurazve.

Chenjedza gwara rako woga
Tsoka dzako dzitsike patsvene poga
Usacheukire rutivi makondo anoona
Anokudzivisa ramangwana rako uchiona
Tsikitsira paumire zai rangu regondo
Mubairo worunyararo rugare nomwero
Usadongore munyika muna mabasa
Unotsvedzera ukafira segonzo mafufu.

Ramangwana rirere mumaoko ako
Mupfungwa nemumabasa ako
Chenjera chinokukotsa mukubwinya kwako
Chinowana chigokuwanikidza mugwaro kwaro
Tondera mwanangu, mimba yakakutumbura
Pawakabva, vanga rawakasiya
Mavende nemisodzi hazvikotsi chiitiko
Tondera mwanangu, pawakatsunhurwa ukachonera.

Nyika ingatarise rutivi ikareva
Vehama vakakutaura vakapererwa
Ungashaye wepedyo wekurereverera
Asi iwe zai rerudzi rangu
Ziva kuti nyika inamabasa ayo
Iwe wakarerwa muimba inamabasa ayo
Zvisakutyise wapinda murutendo rwepfuma
Pfuma inouya kune akachenjera, anoishandira
Simba rehove riri mumvura
Rako iwe riri muna Musiki.

Chichenjera mwanangu zanhi ndabaira
Chawawana batisisa mudzimu unopa kamwe
Chisingaperi chinoshura
Chinomhara chabhururuka
Nyika inamazino namaoko
Inokutorera inokukamurisa
Chinatsa tsoka dzako
Matambudzo ose anopererwa
Chenjera mwanangu
Chisingaperi chinoshura
Chisingaperi chinoshura…….

Chisingaperi chinoshura chinobhururuka chinomhara
Natsa kwawabva kwaunoenda husiku
Vakuru vakataura kare wani
Naizvozvo vacharamba vachitaura
Angu mashoko ndareva ndapedza
Ako mabasa uchizadzikisa ndatenda.