Daldal-Lot Poem by Ferdinand L Quintos

Daldal-Lot

Daan la’n kaugalian ed kaumaan
nagkalalo la ed saray katatkenan,
no bilang inaro ed bilay so inatey
akisan da na makapaab-abagey.

Daldal-lot no tawagen nalapu ni’d saman,
katekep na masyado ya kaermenan
tan kabansag na pansalmay da iray lua,
say bilay nen inatey utel na istoria.

Wala’y daldal-lot ya tua’n makapasibeg,
liknaan na saray ondengel natenyeg,
wala met so daldal-lot ya makapalpalek,
balet diman ed sulinek ka onelek.

Si Tio Dorot kinetket na madita’n oleg,
tampol-tampol sikato so nanpasireg
insan nauyos so bilay to ya binayes,
asawa’n Tia Marin dia’d ermen alemes.

Una’n labi labat na lamay nen Tio Dorot,
ginapuan la nen Tia Marin so daldal-lot,
wala’y tono ya makapabegas na bago,
aro to’d si Tio Dorot intagleey to.

Dorot, inyogaog to, inaro’n asawak,
akin et bengat la ya tinaynan mo ak?
Karuman labat bilay ta so napno’y logor,
bangbalet natan siak la so manbokbokor.

Manag-agos so lua tan linget ed lupa to,
dia ed pagew mandal-daluyon so ermen to,
say duara’n sali bigla to’n inkansa-kansag,
nilakap to so longon, ngalngali ya naplag.

Saray milalamay wala’y manlua, mansinglot,
alikna da met so ermen to’n manutot;
say boses nen Tia Marin tinmaningting lamet,
intuloy to’y litania to’n marandanet.

Karuman, ‘kuan to, masaya ka ni, asawa,
aso’y pinakan mo, sa’y kuan mo, “toto dia, ”
sinibuagan mo na ilik ira ‘may manok,
ya makmaksil mo’n tinawag na, “korrrok.”

Saray totoo’n wala’d bintana sinmelek,
inmarawi’n ag natepela’y ayek-ek,
akikerew ira’y kape’n agay lay pait
pian say imis ed lupa da so naaknit.

COMMENTS OF THE POEM
READ THIS POEM IN OTHER LANGUAGES
Ferdinand L Quintos

Ferdinand L Quintos

Bayambang, Pangasinan, Philippines
Close
Error Success