Ghazal-Lagte Hain Bhaley Poem by Akhtar Jawad

Mujhko to bas woh usi waqt hi lagte hain bhale,
Roothe hote hain manata hoon woh milte hain gale.
Woh bure to nahin lekin bahut ache bhi nahin,
Aa to jate hain magar aate hi kehte hain chale.
Rakh ho jae yeh dil rah-e-wafa ho roshan,
Main to din rat dua bas yehi karta hoon jale.
Rat aayee hay magar aap nahin aaye hain,
Mujhko keya lena hay is rat se dhalti hay dhale.
Waqt keya aaeya gawarah nahin nafrat mujhse,
Woh ghari aai hay mujhpar ke jo taale na tale.