Kadtong Babaye Sa Buntod Poem by RIC BASTASA

nakita ko kadtong babaye sa bungtod
nga naghilak
dugay na kadtong panahon
ug wala akoy katakos
pagpangutana kaniya
nganong
dili husay ang iyang buhok
nganong wala siya sa iyang
kaugalingon

wala ako kahinumdum
kon siya mibungat sa pulong
mahitungod kanako
o kaniya ba hinoon
apan naningkamot siya
nga magpuyo
nga malinawon bisan
pa ug pagsaway
ug pagtamay
sa akong mga katigulangan
ug sa among
mga halangdong silingan

pagkadugay na sa panahon
namatay
gilubong na ang babaye
nga naghilak sa bungtod
ug sultihan ko kamo

inahan ko kadto
ug karon
gikamingawan ko