Moulvinama (Nazir Akbarabadi Ki Rooh Se Mazrat Ke Sath) Poem by Sarmad Mirza

Dhoti pehen ke shehr mayn aata hay moulvi,
Kapde naye yahan pe silata hay moulvi,
Rangeen TV ghar mayn jo lata hay moulvi,
Beevi ko apni shehr bulata hay moulvi,
Raton mayn chup ke film dikhata hay moulvi,
Subh uth ke khoob bat banata hay moulvi.

Pehle kaha ke ismayn to shaitan hay bolta,
Aur ab kisi bhi hal mayn isko na chorta,
Jab tak bulava aaey na beevi ka, dolta,
Mike se apna ishq kabhi bhi na bhoolta,
Paise jo do namaz parhata hay moulvi,
Khutba bhi humko ga ke sunata hay moulvi.

Auron ko jo sikhaye kabhi khud na kar sake,
Aata hay apne waqt pe tankhah agar mile,
Tankhah mayn jo der ho aata hay der se,
Aiy moulvi khuda tujhe thori si aql de,
Masle nae jume mayn uthata hay moulvi,
Khud nachta hay subko nachata hay moulvi.