Porque Me Has Amado Poem by Jessie Ilagan

Porque Me Has Amado

Bakit ikaw pa ang aking minahal?
Gayong hindi ikaw ang laman ng dasal
Kung pag-ibig lang sana'y naaaral
Puso'y tuturuang sa iba magmahal

Wala naman sa'yo ang hinahanap ko
Ngunit ang puso ko ay nabihag mo
Sabihin mo naman ang iyong sikreto
Sapagkat ako ay patay na patay sa'yo

Puso'y masaya sa tuwing nakikita
Ang iyong tila nangungusap na mata
Hindi kaya ako ay ginayuma
O kaya naman ako'y minahika?

Ano nga ba ang dapat kong gawin?
Upang ako'y wag mong balewalain
Pusong nasasaktan sana'y pansinin
Aking pagsamo sana'y iyong dinggin

Nais nang sabihin sa aking damdamin
Paglingap mo ay wag nang asamin
Paglalambing mo wag nang hintayin
Pagkat puso ko ay napapagod din

Kahit nasasaktan at may dinaramdam
Puso kong ito'y di magpapaalam
Sapagkat ang puso ay sadyang maalam
Daig ang isip na may agam agam

January 15,2010
Riyadh, K.S.A.

COMMENTS OF THE POEM
READ THIS POEM IN OTHER LANGUAGES
Jessie Ilagan

Jessie Ilagan

Golden Gate General Hospital
Close
Error Success