Qeemat Bhi Chukatay Hain Poem by raziuddin razi

kisi tabeer ki khahish main yeh jeewan gaNwaatay hain
agar ik khaab daykha hy to qeemat bhi chukaatay hain

hamaray is safar ka jaanay ab anjaam kaysa ho
keh jo bhatky huay hain woh humain rusta batatay hain

ana, shikway, shikayat, roothna, naraz ho jana
tumhain to yad ho ga hum yeh sab kuch bhool jaatay hain

humain bhi chaahiay sahib koi khil_at, koi mansab
mahaz e jang sy hum bhi to bas nakaam aatay hain

hamaray paaon main rasta nahin bas bay qaraari hy
agar bhutkain bhi to us ki taraf hi laut jaatay hain

razi hum ko khushi koi kabhi poori nahin milti
yeh aankhain bheeg jati hain agar hum muskraaty hain