Re Ruteng Ditaola Poem by madihlare christobeth molapo

Le reng le re bona re ithweša ka letolo la sa re amogetše?
Le reng le re tlogela re iphahla ka diphego leboelela?
Le reng la bona re wela leopeng la re ke sebjalebjale?
Le reng le re tlogela re kgopediša le tša phaku?
Bangwe re di gamola di tšhollwa ke bafaladi,
Bangwe le go di dupa ga re dire,
Bangwe re di latelela majafeleng,
Ga se megabaru re nyorilwe,
Re ageletša le tša go selekiša dipelo,
Ra re go metša ra betologa ra hlatša,
Di selekiša le kolobe ya kolobe.
Ra nyamiša le baditšhaba,
Ga se matepe re a hlaelela,
Re šitwa le ke go tšwara dintepa le makgeswa,
Lena le khupile tša go feta le nose ka bose,
Re tšheleleng mohlomongwe di ka dula mpeng.
Ge di na le mpholo re tla ba babolawakebeng,
Re tšheleng ka tšona putswa tšešo,
Tša bafaladi di re šitiša go phekolana,
Re ruteng taola tše Baropodi.
Le se tlo ya badimong le mekotlana ka moka,
Ya ba gona ge re šetše molaleng,
Ra šala re botšana dišele,
Ra šala re wetšana maweng re segwa ke bomašianoka,
92 Tsa Borala
Bophiri šeba le a ba bona ba a re bakiša,
Ba le dikologa ge le ntšha nko le ge le tshela kgomo mokokotlo,
Re ruteng taola tše ba se tlo le rwala natšo ka moka,
Ya ba gona ge re tlo šitwa le ke dinonwane.
Nna yena ke llela nakana,
Le ge e le ya mokhura mpheng,
Ya go tšwa go lena e tlo kgebiša segošane