Serbisyo Publiko Poem by MELVIN BANGGOLLAY

SERBISYO PUBLIKO
Melvin Banggollay


S-erbisyo publiko ket maysa nga ehemplo
Iti panangipakita iti ayat iti kakailiyan
Saan laeng koma no adda ka iti gobyerno
No di pay ket uray iti pribado a pag-teggedan.

E-hemplo’t pan-nangipaay nadalus a serbisyo
Iti siasi numan nga kabsat nga agkasapulan
Iti naan-anay a tulong nga agputar iti puso
Nga addan rag-o a mangsaranay ti kailiyan.

R-igat ti pangaserbi di na pulos ikan-kano
Uray no ag-overtime no isu’t kasapulan
Tapno laeng matungpal ti akem ken trabaho
Nga sinapataan iti sidong ti Dios ken pagiliyan.

B-iag na ket idaton na iti nagan iti panagserbisyo
Ta isu’t pakaragsakan ken pakalag-anan
Saan laeng nga gapu kas sukat iti suweldo
No di ket daytoy ket misyon na iti pagiliyan.

I-daton na ti bagi na para iti sinapataan a trabaho
Uray no kanayon nga agsakripisyo iti masansan
Uray no bassit ti kasukat a tangdan wenno suweldo
Adda rigta ket ayat na nga agserbi a pagulidanan.

S-erbisyo na libre pay uray no pudno a nagsakripsiyo
Ta pakaragsakan na tumulong kadagiti agkasapulan
Uray pay no narigat ken napiggad ti oras ken tiempo
Sidadaan latta nga mangipaay serbisyo a paguadan.

Y-akar na pay ti opisina na iti balay na gapu’t trabaho
Ta uray no adda iti pamilya na ket pudno a sidadaan
A mangtaming problema ken mangited iti serbisyo
Kadagiti isu amin a kliyente wenno agkasapulan.

O-ras ti panagserbisyo awan pilien na a tiempo
Uray no adda didigra a pudno a pagam-amkan
Uray adda kalamidad kas koma iti bagyo
Sidadaan nga mangidaton kasapulan a serbisyo.