Singqi Seafrika Poem by Anele Potelwa (Unpublished)

Kwakusiya kubakho imincile ngeza ntsuku,
Ayemana ukubaz'amehlo engangxengwanga bubuthuku,
Isacholo sinyuka sising'ekhondweni,
Zibhodl'ubusi neentsana zasemaqabeni,
Libhabhela phezul'inxili kushukum'unomtidili,
Bayibize ingoma abafana bengengawo amaqili,
Kungaba njalo kuvungam'imimoya,

Kwitimiti ngumlisela ekuwo umtshotsho,
Lonwabe ulutsha ibe luchulumanco lokuxhelelw'intshontsho,
Kuxhel'exhukwane bandule ukuzimas'umbholorho,
Imilonj'ibabaza iziduko zakwaNtu ngaphesheya kwebhulorho,
Ikhwatshuzel'imikhwetshelele ngentlangothi,
Zixhentse zidude neengqolosi kukhalaz'amaphakathi,
Kungaba njalo kuvakal'isingqi!

Singqi sakwaNtu esithi sakugoloza ndonwabe,
Singqi sakwaNtu esithi sakuhlokoma konwatywe,
Utyibilika kuyo impandla aphakam'atyityimbe amaxhego,
Uvunguzelisa intsiyane atsh'amayeyeye kuxhents'inkondekazi kumagogo,
Kutsho kuhlokom'ingwatyu nomnyel'endodeni,
Anqunqwe onke amaxhala afakw'egoqweni,

kungeyiyo intlombe ingumcambalala,
ingeyiyo indlame ingumqabalala,
woyiswe umxhel'ujacekile esintwini,