The Captain’s Lady Poem by Robert Anderson

The Captain’s Lady



``Lassie wi' the coal--black locks,
Wilt thou be a captain's lady?
Quat bare mountains, glens, and flocks,
Heed nae mam, or canker'd daddy.
Hie wi' me o'er Scotia's hills--
By this sword, nae loon shall harm thee;
Thy sweet luik my bosom fills--
Let nae sodger e'er alarm thee!''

``Stranger, ware nae words on me,
I'd no' be a captain's lady;
For the gowd o' Chrissendie,
I'd no' lea' my feeble daddy!
Grey wi' years, bow'd down wi' pain,
Jean's his hale delight and treasure;
In rude cot we envy nane,
Thae wild glens ay gie us pleasure.''

``Lassie, dinna turn awa';
Suin in costly gear I'll deck thee,
Big for thee a house mair bra',
Mistress o' the hale I'll mak thee:
Thou shalt see the auld folk blest;
I'll protect 'em frae ilk danger;
Age and puirtith ay lack rest--
Dinna frown upo' the stranger!''

``Near yon kirk my mither's laid,
Tears o' sorrow I shed o'er her;
Your red coat and bra' cockade,
Ca' to mind ane I lost for her;
Dear he lo'ed me, sought my hand;
Mair I priz'd my mam and daddy;
Suin far frae his native land,
They slew my faithfu' shepherd laddie!''

``Thy bright e'e's dimm'd wi' a tear,
Mine, to see it, sheds anither;
By the pearly draps, I swear,
Happy days we'll pass thegether,
I'm thy ain blithe shepherd lad,
Rich, and hale, and honest--hearted:
Haste, let's mak a parent glad,
And may we ne'er again be parted.''

COMMENTS OF THE POEM
READ THIS POEM IN OTHER LANGUAGES
Close
Error Success