The Lady Grange Poem by Carolina Oliphant

Air - 'In Lonely Wilds.'


Oh! lang the Ladye Grange did live
Upon St. Kilda's rock;
But surely sorrow winna kill,
Or else her heart had broke.
Far, far removed from kith and kin,
And a' that life endears,
She aft looked o'er the wat'ry waste
Whare ne'er a ship appears.

O! is it for my faither's crime
That I'm thus banish't far?
Or was it ony faut o' mine
That kindled civil war?
M'Leod and Lovat, weel I trow,
Hae wrought this treacherie;
But wherefore has their cruel spite
Fa'en a' on helpless me.

And thus she mourn'd, fair Ladye Grange,
Thus sped her life away;
The morning sun it brought nae joy,
And night did close the day;
And nought was heard but sea-bird's cry,
To cheer her solitude,
Or the wild ranging billow's roar
That broke o'er rocks sae rude.

At length a fav'ring wind did bring
An auld and worthy pair,
Wha wi' the kindest charitie,
Her sorrows a' did share.
They taught her pridefu' heart to bend
Aneath the chastening rod;
And then she ken'd her prison walls
Had been a blest abode.