Uni Na Naman Ako (An Bulan) Poem by Xianah Park

Naga.
Uni na naman ako nasa byahe
pauli pa sana ako pakatapos kan klase
nakasakay digdi sa bus na piot
madiklom ang banggí asin malipot-lipot

Ayos man an sakuyang pwesto
OK an tukawan buda aircon feel ko
Naka-on an TV sa inutan
mga tawo payt an ngarakngakan
Ako nagsa-soundtrip labot ko saindo
komportable na ako digdi sa sadiri kong mundo

Pili.
Sa likod ko may mga solterong bungal
Daing púndo sa kadadaldal
Enjoyun pa sa pig-iiling na pelikula
Tapos bigla minakanta, aw inda!
P*ngal ta mairoon ining saro sa likod ko
Nagkakasiripa asin nagkakasuruntok an likod kan tukawan ko
Baba na daw kamo mga noy o!
Maray kun kamo mga gwapo!

Baao.
Mailing na sana ngani ako sa luwas
Sa mga tig-aagihan kaining bas
Mga tindahan, tawo, ayam asin mga nag-aaging sakayan
gabos na mga ini nawawara na kapag naagihan
alagad may sarong bagay na dawa agihan mo
masunod asin masunod man siya saimo

Nag-iling ako sa kaitaasan
tigtánaw ko ang bulan
maliwanagon, bilogon, sadayoton sa arayo
Nabua.
Pero niata daw ta pig-iiling man niya ako?
tigsusunod niya man ako
Dawa nagpikit ako tapos minadilat na siya
niaon pa

Naromdoman ko kan bago pa ako sa Naga
Nagdigdi ako for further studies kun baga
1st day sa klase sa masteral sa Ateneo
Mga tawo o dalan dai ko pa bistado
Polangui.
Ngonian naglipas ang pirang bulan
Dakol nang bagong naaraman
Dakol nang namidbidan
Dakol na man na-shoppingan
Sarong lalaking kapandokon ko nailing ko man
Ngonian maski purupano
May mga pagbabágo na man sa buhay ko

'Because I miss you, ' namamati ko sa sakuyang earphones
Lintik ta ini pa ang nagsunod na kanta sa playlist
Naromdoman ko lugod mga tawong padabaon ko daw
Oas.
Pirang bulan na ako sainda napupungaw
dati purupirmi ko sindang kaiba sa eskwela
Karaunan, karantahan, jaraming 'Enjoyun kita! '
Ngonian mga tawong ini dai ko na naiiling
Ining bulan sa itaas sainda man daw na tig-iiling?
Oy! Kamusta na kamo?
Makauyam ang buhay pag kamo wara, dios ko!

Minatapos na man 1 sem sa eskwelahan ko
kun saen ako nagtutúkdo
Primerong trabaho ko
pakagradwar ang magpakapropesora sa kolehio
Ligao.
Dawa ako bente pa sana asin akiúnon pa
high-class, competent asin cool maliban sa iba pa
ang narisibir kong mga komento
Guinobatan.
Sa totoo dai ko man pigtuyo
basta sabi ko sa sadiri ko
'Mag-enjoy asin magtultol sa trabaho
mga estudyante makaukod asin mag-ogma saimo'
Dawa bitin an nakaaging mga bulan maogma ako
ta maski papáno may naukodan sinda sako

Hay.. grabeng muni-muni ini ano?
Arog talaga kaini pag sa bulan sana nakatutok mga mata mo
Camalig. Malabog. Daraga.
O, arani ka na magbabá
Pag-daydream sa banggi, pundoha na!

Nakabalik na ako sa sakuyang ginikanan
Aw ta nagsunod talaga sako ang bulan
Dai ko aram an rason kun nata gari
sobra ang gayón mo ngonian na banggí
Dai nino pag-isipon na ako sarong weirdo

pero bulan...

nuarin daw ako makakad'yan saimo?


October 2013