Wala Daw Tay Buot Pa. Kon Maghisgot Ug Gugma Poem by RIC BASTASA

.
naulaw ko kaniadtong
misayaw kog lambada
diha nimo. Pasko kadto
unya ang imong gisuot
binurdahan nga blouse.
Itom akong karsones
unya puti ang polo.
Gisura ko nga murag
si jose rizal. Unya ikaw
kuno ang akong josephine
bracken. Abi mo dunay
kagilok ang gibati sa
akong ilok, labi na adtong
gihapohap sa akong mga
kamot ang imong bukton.

duna tay larawan nga
akong gitagoan. Black
and White. glossy, unya
ang kilid gikitkitan na
sa ok-ok nga seguro
wala nahilo sa camphor
nga akong gibutang didto
sa aparador ni Tatay.

wala pa daw tay buot
kon maghisgot ug gugma.