थिरिँ बिरिँ 971-1027 Poem by Ronjoy Brahma

971
आं मिनिदोँ
गावनि बुजियै
मानो मिनिनांगौ जानायाव?
972
लोगो नोँ आंखौ गोबादोँ
आंनि गोरबोआव
आंनि बोराबनायाव।
973
मोसा फैनाय गोरबोआव
जिउनि आगु रोजाबनायजोँ
बियो फैयो आरोबाव।
974
बे हरा जानांगौ हरानो
जोबोद खोमसिसिन
अदेबानि बियो गैलियामोन।
975
लामायाव फारसे आखायखौ
आफाखंआव एथेबो
गुसु मोन्नाय सोलेर।
976
दैसामोन मोनसे गोरबोनि
जिरि जिरि बोहैनाय
गोजोनमोन सुदेम मिजिँआव।
977
सनाथि दुब्लिनि गाबजोँ
सनाथि सान
समायना नायनो समायना।
978
आं थांगोन आफानि उन उन
आफाया आंनि दैदेनगिरि समनि।
979
दुंबुर दुंबुर अर
मोदोमाव नांफैदोँ
आरोबाव साननि फुंबिलि बिलिरनाय।
980
सोदोब गोबां खन्थाइ गोरबोआ
गलियो रेबगननि दुंबुरजोँ
खायजिर खायजिर।
981
मेथाइ रोजाबफैयो खोमायाव
रैसुमै गोदै
बिफांआव बानानै दाउसिन।
982
आंनि थाबायनायाव
हाद्रिया खुदोँ
लामाया हाद्रि जाबाय।
983
मिनिखैरो मिनिनाय बारजोँ
समायना बेसर बिबारनि
नायनो समायना नुयो गाब।
984
फैनाय बे गुसु बारजोँ
गोजांस्रिउ मोनो सोलेर
गुसु गुसु फुंआव।
985
लानजानि साना
सोरां फैयो खोमसि खथायाव
खोरखि खनाजोँ एब्रेयो सोरां।
986
बेयावनो फैदोँ मिनिसुलु
लाजिनाय
सुदेम सुदेम बारजोँ।
987
रजे-
नोँनि बै मिनिनायखौ
नायनाय थानो गोसो जायो
रंगिना गाब गोजोन दं बेवहाय।
988
निजोरा-
रैरुब रैरुब आंनि गोरबोखौ
नै नोङो बिलिरो
मोसा मोसि मेगनखौ
नोँ सोरां होयो।
989
नै खोमसिया फैबाय
गालांबाय आंखौ सान रजेया
थाखोमा हैबाय फैसालियाव
नै जेबो नुलिया मेगनजोँ।
990
नै लामा जिउ आंनि
बे लामाजोँनो आं थाबायो
नोँनि बिखाजोँ आं मानबायो
नोँ आंनि अराय लोगो।
991
गोम गोम हाग्रा बंग्राखौ
एवस्रां दानस्रां जोँनि गामि
सोरगिदिँ जेरैबो आबाद खालामदोँ
बेवहायनो सुखु-दुखु रायजो जानो।
992
बेसेबा गोजोन गोजोन बुहुमा
सोरगिदिँ बायदि बानसा
नोँ आंखौ गोबादोँ बिखायाव
नोँनि सोलेराव मिथिँगाया गेलेदोँ।
993
नोँनि रंजानाय गेलेनायजोँ
फुष थाङो मागोआ फैयो
नोँनि रंजालि गोरबोजोँनो
फागुण थाङो बैसागु फैयो।
994
नोँ जेसे गोजानाव थायो
आं समायनासिन नुयो
आंखौ दाबाव नोङो
नोँखौ नायहरबाय थागोन आं।
995
आंनि आगान आगान फै फंबाय
आंनि आगानखौ दागार नोङो
आंनि गियानि जायोब्ला
नोँबो गियान जागोन फंबाय
आंनि दायखौ नोँबो बिजिर।
996
आयनि उनाव आय नोङो
नोँनो आंखौ गेलेनो फोरोँबाय
बिमानि उनाव नैथि बिमा नोङो
नोँनो आंखौ थुलुंगा होबाय।
997
जोनोम होबाय नोँ आयै
मानबायनो थाबायनो फोरोँबाय नोङो
नै आयै आंनि आममा
जानो राव रायनो फोरोँबाय नोङो।
998
नै आंनि लोगो
नोङो थुलुंगा जिउनि
नोङो आंनि मिजिँनि बैथा
दावगा लांगोन सानैजोँ लोगो लोगो।
999
फेरेँगा गाब्बाय फिउ फिउ
जुंगाल जुरिना हाल होलांबाय
दाउला गेसेरबाय सोरां जाबाय
नांगोलनि आन्थोर आन्थोर आफानि आगान।
1000
नोँनो आंनि जिउ रजे
नोँनो आंनि सिमां मोकथां
गेलेनाय मिनिनाय दं गोरबोआव आंनि
गाबनाय हांमा सावगारि दं नोँनि।
1001
बहा थायो आंनि गोरबोआव
रंजानायनि बबेबा खनायाव
नागिरो लैथोआव नोँखौ
नागिरो अखोरांआव नोँखौ।
1002
बार नांबाय
बारजोँ रंजाबाय
गोजांस्रिउ गोजांस्रिउ जोँमा सान्दुंजोँ
अरबाय गोसो अखोरांजोँ
सानसिरिबाय गोरबो लैथोआव।
1003
दाउ खौऔ रोजाबनायजोँ
एम्बुनि गारां हगारनायजोँ
जोमैया खाम दामदोँ
औवा बिजौआ सिफुं सुदोँ।
1004
रजे-
नोङो दाखारलां सना
देवोलनि आबिर लानानै
आं मिथिनो मोनै बिखाजोँ।
1005
सोरगिदिँ जेरैबो निजोम
बार गैयै गोमोथाव मिथिँगा
आंनि निजोमथिखौ होखारफैयो दाउसिन।
1006
मेगनाव साया माया
हैयामैया
उन्दै समनि गेलेनाय
दा दा गोसोनि आयनायाव।
1007
खोमसि अखोरांनि निहोर
हराव
जोँथि माथि हाथर्खि
नायहरदोँ बुहुमखौ मिनिजि।
1008
दुंरोम दुंरोम फुषनि सान्दुंआव
दैसानि बुसावनाय
दुबसां बालाफोरा नायहरदोँ।
1009
आंनि गामि बारै
हरैबो आंगोनि गामि
सोरगिदिँ रुमबां रुमबां।
1010
लोगो
आंनि फिथाइ गैयै लुबैनायखौ
नोँ आहुति हो
गोमोर लांथोँ नुयैआव।
1011
सोदोबथि गैयै
जिँगानि बुब्लि
गोमालांथोँ गोरबोनि
बिनिनो फरायनाय गियाननि।
1012
गोथैसालि मोखां दावबायारि
नै लोगो-
नोँनि गोदोनायाव माला
समायना रमायना बिबारनि!
1013
गोजा जाहाब जाहाब
बे बेलारोम समाव
फैफिनगोन इशारा साननि।
101
बिसोरखौ नुनानै
गोरबोआ मोसाखाङो
नाथाय मानिबा गाबनाय
जोमै दं बिसोरनि मोखांआव!
1014
गोदान साना फैबाय
आंनि गोरबोजोँ
आं दा बयखौबो सिनायगौ।
1015
गोसोनि रोदोमनाय
अलसिया मिजिँफोरखौ
फिउ फिउ गारहरो फुनानै
गेरेमसा सिमां फसंनो।
1016
मिथिस' हायै इयुननि
रंगिना सावगारिफोरा
बिबार बारफैयो गेवलां गेवलां
बिनि सेराव थांगासिनो आंनि आगान।
1017
सोलेरनि रोदा रोदा दोँफ्रोमाव
मिजिँनि थुलुंगाखांनाय
सोरांनि रिफिनाय जोँखांफैदोँ।
1018
आं बोनाय हांआ
जोबोद गोदान
दुखुनि मोनसे दाहारजोँ
खुसिनि फैसालि बेखेवनाय मिजिँ गोनां।
1019
गोजाम जिउनि सिमांफोरा
दिनैनि फैसालियाव गसंफैबाय
सिमां दंबावो मोनसे फैसालिनि।
1020
गोदान रंजानायनि
जावलिया मोन्दांथिफोरा
मोनसे सोरां मुलुगनि फैसालियाव।
1021
बै समनि दुखुआ दिनैनि नङा
दिनैनि दुखुआ जोबोद गोदान
जिउनि सुलाद नागिरनाय।
1022
बुंथि हायै सान्नाया
आंनि गोरबोआव एग्लुंदोँ
आद्रा थानाय सिमांनि।
1023
मिथिँगा-
नोँनि गोरबोआव जोनोम मोन्नाय
आंनि जिउआव जोबनो गैयै अन्नाय।
1024
बियो दाय बारगनायनि
मिनिखैरो मिनिनाय नङा
बे साजाखौ आं बानगोन गसाइ!
1025
आं गाबदोँ दुखुखौ नुनानै
मोदैया बानानि महर लादोँ
बुहुमाव रेजेदनाय
थै सेरेपखौ सानसे सुस्रांगोन।
1026
मेंनानै लोरबां जानाय
बायग्लिनाय देँखोजोँ
हांख्रायो आं बैसागुनि गोदान बार।
1027
बिषनि जोलै फुलिखौ
बुखुनानै गारहरनो
खिन्थायो दाउसिन दाउलाया।