दावगादो बर' हारि Poem by Bidindra Basumatary

नै बर' बिमानि फिसाफोर,
नोंसोर हारिखौ गेरेमसा खालामदों
खौसे जादो, सुद्राय लायदो;
मुथासे सम थानायावनो जादो सांग्रां
बयबो ज' जादो जाथानि सिङाव
अरायबो दावगालांनो बे मुलुगाव,
नङाब्ला थैलांगोन जोंनि हारि आरो
नेर्सोना जोंनि गोमोरगोन बे बुहुमाव।
नायहरनायसाय हनै सुथुरा फैगौ
फालो-फालो जेथिंनिफ्रायबो जोंखौ गाग्लोबनो,
रां-रुपा दोहोन-दौलद लुथिनो
खालामनो जोंखौ निखाउरि नाथि नाजुरि;
दाथासै जों आरो
फावसयनानै उन्दै जानानै
बे बर' बिमानि बिखायाव।
दावगादो बर' हारि सुथुरखौ फोजोबस्रांनो
बयबो खौसे जाना
हारिनि गोहोखौ सिगांआव लाना,
दिन्थि सुथुरनो बर'नि गोहोखौ
दाफावसय जों सुथुरजों गेजेन जाना
दं जोंनियावबो जोहोलाउ-जोहोलाउजोनि थै;
दाजासै जों गावजों गाव गोसोआव
सुथुर ।
नायहरनायसाय हनै
बै जोंखोल अखोरांआ
जाबाय दसेनो गोसोम खोमसि
दाउखा बिदै,
बबेनिफ्रायबा फैनाय बारजों।
बर' हारिनि सिनायथिखौ खोमोरनो
नाजादों गुबुन हारिया
दबथायनो नाजादों बर'नि गोहोखौ
नाजाबावदों आरो
बर'खौ बुहुमनिफ्राय होखार हरनो।
नाथाय बे हारियाबो खम नङा,
दं बिसोरहाबो हाजासे गोहो-बोलो
लोगोसे दं सोलो बुद्धि,
नाजादों गोदोनिफ्रायनो खालामनो हारिखौ गेरेमसा;
सुथुरनिफ्राय रैखा होनो
बर' जोहोलाउ-जोहोलाउजोफोर
ओंखारबोदों बिखा फोरदानना
फोरोंलांनाय जोंनो गान्धी बड'फा
सोमावसारनो अहिंसानि खान्थिजों,
खालामदों बेखौबो हिंसानि खान्थि
जोंनि सरकारआ फाव फान्दायना,
बुख्रुब-सुख्रुब खालामदों
दाइ गैयै गोथार जिउनि सुबुंखौबो
इनाय अनागार साजा होदों।
गैया बिसोरनियाव अननाय-खाननाय
हारिनि थामोन्थाखौ रैखा खालामनाय
बर' जांख्रिखांआरिफोरा जानांदों
बिसोरनि बुलि।
सोर दं दिनै बेफोरखौ बिजिरनो?
बुफायबाय बिसोर हारिनि सिनस्रि
लुथिलांबाय दोहोन-दौलद, रां-रुपा
जेरैबो जेथिंबो सिलिंखार खालामबाय।
बर' हारि दावगादो
हारिखौ गेरेमसा खालामनो
होखालांनाय बड'फानि खान्थि
बेखौ जों दानागार
दानागार जों 'बड'लेण्ड' सोमावसारनाय।
दावगासारनो जों हानजा सुरफिन
हाया पुलिसनि राइफलनि गुलिया
सौफ्लंनो बर' बिमानि फिसाफोरनि बिखाखौ;
दाउखा बिदै अखोरांआव
बर' गामियाव मानिदि अर?
मानिदि उखुन्दै एसेबां मानि? ?
गन्थंआव हाबदों हबा-हब
जोसा माइबोरा माइनि खामनाय
अरखाम! अरखाम! !
रोहो रोहो अरखि बर'नि बाख्रियाव
जोबलांबाय बेसेबा दोहोन-दौलद,
गोमालांबाय माखासे जोहोलाउ-जोहोलाउजो।
माबोलादि हागोन जों
बर'नि अखोरांखौ जोंखोल खालामनो
खोमोरनो दावखा बिदैखौ?
फै जों बयबो खौसेथिनि लोखौ बोजबनानै
खना-खनला थानाय बर'फोरखौ खौसे खालामनानै
मिनिस्रां होनो बिमानि मोखांखौ,
खालामनो गोजों बर'नि अखोरांखौ
खोमोरनो दाउखा बिदैखौ।
दावगादो बर' हारि
दुखुथिया बड'फानि सिमांखौ मोखथां महर होनो,
बिफानि सिमाङा सिमाङावनो थायोब्ला
हारिया जागोन निरौ-जिरौ;
बड'फानि सिमां बर'खौ
बुहुम बिखायाव गेरेमसा खालामनाय।
दं जोंहा सिनायथि-
जोंनि सिद्लायावनो,
आजै-आजौमोना होलांनाय
बाथौ गुदियाव गेरेमसा सिजौ बिफां;
जायनो जोंनि बिफा अबंलाउरि।
दं जोंहा सिनायथि
जोनि मोदोमावनो-
आजै-आजौमोना सोरजिलांनाय
साल खुख्राव-खुख्राव दानाय
जायनि जिख्लाबसे मोदोमाव
मिथिंगानि लाइमोन महर।
जोंहा दं सिनायथि
जोंनि खुगायावनो-
जायखौ आंगोनि आंगो बिमाया
रैसुमै गारांजों फोरोङो
सोलोङो जायखौ जों उन्दैनिफ्रायनो
बेनो सिनायथि जोंनि खुगानि।
दानागार जों सिनायथि
जोंनि सिद्लानि,
दानेवसि जों जोंनि
मोदोमनि सिनायथि,
दामुगै जों जोंनि
खुगानि सिनायथि;
दावगादो बर' हारि
बेफोरखौ बोजबना लाना
गोसोआव आंगो सानना
मुगैलायनाय, नेवसिलायनाय, थगायलायनाय
गासैखौबो नागारना, गारना,
दावगादो बर' हारि दावगादो।