बैसागोनि बरायलु बारजों
बर' आइजोफोरा मोसाफादों
नै!
____समायना-रमायना दखना गानना
हायलालाय-हुइलालाय बागुरम्बा ।
-
बर' हौवाफोराबोसो नै जोंनि
खाम-सिफुं-जथा-थरखा दामदों
मिलौहाब देंखोनि खबाम रिहोदों
बर'नि हारिमु बेसेदि समायदों
गोमोथाव हारिमु बेनो लोगो बर'नि।
-
आबै लामब्रेयाबोसो नै
मोदोम दैखोनो हायिखौ लानानैबो
_____साफ्रे-सुफ्रे हनै!
गावनि आंगो हारिमुआव दिनै
बेखौसो आं गोमोसिन्दों लोगो।
-
नै लोगो आरोबाव-
आबौ गबदामोननि खाम दामनाय
हां थिफुं-थिफुं सिफुं सुनाय
____गैथारलि गावसोरनो
बारग'लांसै सोलेरानो
अब्लाबो लोगो नुदों बिसोरखौ
रंजादों मालाय गोसो होफ्रानानै
दिन्थिदों गावनि आंगो हारिमुखौ।
-
आरोबाव नायबावलाय लोगो
नायबाव नै हारिमु फोथाराव
बिहामजो आफादनिल' ग्रोम ग्रोम
जोंलाय मानोथो सिरि निजोम
_____लोगो नुबाय
जोंहादि गैया बेयाव जायगा
ओंखारनाङासै जों बिदियाव?
गुबुनखौ मा बुंनो लोगो
नै आंबो उदायरोङा।
देलागब नायदोंल' लोगो।
रोङा हैनानै थायोब्ला
जेबो उदिस लायाब्ला
जोबलांगोन सानसे जोबलांगोन।
____आं रोङाबालाय
थिननांआ गुबुनखौ?
उन्दैफोरनो खिन्थागोन
रेक'र्दिं खालाम खालाम
बेखौनो नायना सोलोंगोन।
बयबो सिनायगोन जोंखौ।।
-
आगै रुमबामोनहा रोंब्ला
फंबाय राखेबमोनहा सोलोंब्ला
बेसे गोजोनगोन
आबै-आबौमोनहा,
बुंस'नोनो हानाय नङागोन! !
-
गोदोनाय हारिमुआ सिरि मोनगोन
गोमानाय देंखोआ रिंखांदाव फैगोन!
बैसागि सिख्लाया रंजाखांगोन
बर' गामिया समाय सारगोन! !
This poem has not been translated into any other language yet.
I would like to translate this poem