सान अखाफोर हाथर्खिनि सायखं
सान मोना रंगिना-संगिना।
जोमै अख्रांनि गाब
सोमखोर सिदोब
दैमा-दैसा लैथो लैथोमानि
स्राय-स्राय बोहैनाय सोदोब।
दाउसिन-दावला मि-जुनार
खौसेयै अनलायनायनि सावगारि।
बिफां लाइफां सोमखोर गावदां
बिबार फिथाइ गेवलां गेवथां रिदि रिदां
हाजो हायेन जौयेननि साया
आंनिनो खाखोराव
रेबगननि बिलिरनायाव
दुखु-दाहा गाबनाय मिनिनाय
रंजा खुसि राज्यो जानाय
आंनिनो लांथिया खाखोराव
गोजोन हिसां-हिसिं मोहेरलायनाय
दावहा-थगायलायनाय, सोबखलायनाय गादबलायनाय
गासैबो आंनि रेबगननि मोसानायाव
बेफोरखौनो आगर एरना
फाख्रा-सिख्रा आगर एरबाय
समायो समाया आं मिथिया
गोजोन बेजोंनो आं
सोरबा साबजानाय सोरबा साबजायि
आं जेबो उदिस लाया।
नायो नाया आं बिजिरा
सोलोंगोन सोलोंआ आं नाया।
बेखौल' लुबैयोदि
आंनि आगरा खाना नांदोंब्ला
खिन्थागोन आसि थुनानै।
ग्रह-नखत्र अक्ष लामानि
गिदिंनाय हांखो लामानि
आन्थोर आन्थोर आगान
गाग्रोमनो आंहाबो हाबिला जायो।
फ्ला-फ्लि सांग्रेमा
हमनो होसोयोब्ला स्रोब।
फोथार-दुब्लि बेसे समायना
फुस माघ फागुन
सैत्र बैसाग जेत
आसार सावन फादोर
आसिन खाथि आघोन
बायदि बोथोराव बायदि गाब
बायदि रोखोमनि फसल
बेफोरबो आंनि खाखोराव
रेबगननि मोसानायनि आगानाव।
This poem has not been translated into any other language yet.
I would like to translate this poem