नोँ गोरिब लोगो
नाथाय नोँ गोरिब नङा,
आरो नोँहा जेबो गैया जानोहागौ
नाथाय नोँहा गासैबो दं। दागि नोँ दागि
जिवनि दावगा लामायाव
दुखु-दाहा जेँना-जेँसिफोरखौ सुस्रांलां
दावगा-बाराय आगानखौ,
नोँहा रां-रुफा न-बां गैयामालाय मा जानो
नोंहा बाय बाहागि बिसुखेथि गैया जानो हागौ
थेवब्लाबो नोँ दागि
नोँनि सोलेरावथ' दं सुबुंस्रिनि मोनथार
थांनानै थानायनि खरसे मेलेम,
आरो नोँनि गोरबो थफ्लायावथ' दं
गोरबोसे बिमा हादरनि गुवार बिखा
संसारखौ अननायनि दैमुसे दै,
मोजांखौ अनसायनाय गाज्रिखौ फोसाबनायनि
साहसि दावगालु आखु
गासैबो नोँनावनो दं।
नोँ हागोन लोगो नोँ हागोन
दावगा बाराय आगानखौ नोँनि थांखियाव
थरथिँसे दै जानानै
रानस्राव साहारा बिखाखौ
गोजोन थाजिम खालामनो।
नोँ हागोन लोगो
बर' बिमानि मेगननि मोदैखौ
आवबा खालामनो,
हारि-हारिसानि उखैनायखौ आबुं खालामनो।
नोँ हागोन लोगो, हाथारगोन
जिवनि दावगा लामाखौ उथ्रिसारनो
हागोन बानगासे बिबानखौ बानलांनो
उनथिँजायल' दानायहरफिन नोँ
खोमसिनि गोथौ हाखरखौ।
This poem has not been translated into any other language yet.
I would like to translate this poem