Lungenako ukukucenga liyakukugxobhoza,
Lithath'inyongo yombongo landule ukuyigqobhoza,
Kungenani aluswel'uthando lwezikhungo,
Kungenani luvum'ingoma yezithuko,
Ndixel'umtshabalalisi wendl'entle yolonwabo,
Ndibabaz'ongenguye umxolelanisi kwelakowabo,
Zingamabhodl'iingcinga kweyakh'intloko,
Zivungama zihleli zikhwezel'intlokomo,
Ntlokomo yokuxhaphaz'imisipha yenzala kwigazi,
Ntlomo yokuxhwth'ulwazi lwezozazi,
Akanihoyanga, HOYI-NA! Kub'unxanelw'iinyembezi,
Akezi nangobuso kub'uvela kwimbombozi,
Ubukroti bakhe bungangengqondo yegwala,
Ubuthuntu bentliziyo yakhe buxel'ilitye lomlambo umGwali,
Esakhe isikhuni asibuyi nomkhwezeli kub'ixhoba likhona,
Esakhe isiXhosa asivakali ngontsokotho kub'izithuko zikhona,
Ngumtyibilikisi kwityendyana leentyatyambo esele ziqhamile,
Ngezimvu zakhe ibonakala mva intshetyana yakhe kodw'igqamile,
Kwehlulek'amakhwenkwe emgubheni
Kwadan'iintombi emtshotshweni
Latsho lahlab'ilanga lakhe lo mphefumlo kodwa,
Laphalal'igazi kuyimvula nezijwili zodwa,
Zenzo ziyishiya imeko igxadalala!
This poem has not been translated into any other language yet.
I would like to translate this poem