Kay Sa Giingon Ko Na Lahi Ta Sa Uban Lahi Ta Sa Tanan Walay Timailhan Poem by RIC BASTASA

sa akong bahin
kon ako na pod puhon
ang mahingtungdan
dili lang pod ko
motagna kon
unsay akong buhaton
wa sab ko kabalo
kon unsay akong dangatan

lahi tang tawo
dili sama sa adlaw ug
bulan
ug mga bitoon
matagnaan ang ilang
mga pagabuhaton
kita dili
makalisang sab
usahay

makamao tang
mosupak baya sa
mga balaodnon
moambak sab sa
pangpang
kon kinahanglan

hunahunaa nga
usahay
nabuhat nato ang
wala mabuhat
sa dagat
sa yuta
sa uban

mas gawasnon pa kita
sa hangin
mas mobaha pa kita
sa suba
maghimo tag buho
nga ato

kinsa bay nasayod sa
palad sa usa ka unggoy
nga manghod natog
gamay sa
pangutok?

ning imong pangutana
dili ko kapasalig
nga ang akong tubag
karon
sakto pa ba gihapon
ugma puhon

kay sa giingon ko na
lahi ta sa uban
lahi ta sa tanan
walay timailhan