Mutya Nin Tatamnan Poem by FRAGMENTS AND PIECES

Nahiling taka sa kairibahan ninda
Mga burak na nagbuburuka pa sana
Tunay na gayon yaon siring sa bagong mata
Nasaldangan kan aldaw garo ipinintura.

Ano na ining kaogmahan kan puso ko
Kan an paghiling ko makarani saimo
Ulay ko an puso nakakamati na garo
Sa saimong pagkaburak, kahidawan na gayo.

Ako sarong ligaw na manlalakbay
Minsan sa paghiling ko ika nakasuway
Namati kong marhay kamunduan sa buhay
Dai nauumayan maski pa luway-luway.

O ano daw ining sakong namamati
Garo hamot mong dai nahahali
Kapungawan kan puso mayong nakakahali
Ta daw ta saimo mayong nakakasanli.

Sa kadakol na magayon na burak sa natad
Ika man sana an boot kong mahagad
Alagad nahahadit ako na ika mabalad
Asin sa pagpudo ko magluyos ka nanggad.

Kaya ginusto kong hiling-hilingon ta ka na sana
Maski sa natitindugan ko ika may distansya
Nawawara man sa paghiling mo ako uya sana
Sa pag-antabay, dawa matunok, babayubuon ta ka.

[madero15 April 2011, Calaguas, Camarines Norte]