Kwathi kanti yayibubuntsundu,
Zathi kanti zazingondlebe zikhany'ilanga,
Lwaqal'ugqushululu ngokwenzondo,
Yazizono kubaphambukeli beentlanga,
wonakal'umzi wesizwe,
zaxhwithan'iimvo zobuhlanga,
wonakal'umbona lixhoshomba,
omhlophe walutshaba kontsundu,
satsho sabuva ubukrakra kubusi besizwe,
kuyimfe iyincind'ebolekiweyo,
kodwa siyalulangazelela olo suku lwemigcobo,
apho iyakube ilulonwabo kontsundu,
iluchulumanco komhlophe,
ndisalilangazelela elo lixa lakudidiyelwa,
aph'umbholorho wemvek'entsundu neyebal'elimhlophe,
zakutsho ngemirhubhekazi womtshato weqhina,
kungenani nxib'isacholo
Mzantsi Afrika,
khon'ukuze bucac'ubuhle benkululeko,
Yikhuph'inzondo kwelo nxili linxilileyo,
manyana ngothando mzal'omhlophe,
khon'ukuze nontsundu axhel'exhukwane,
Nxib'isacholo Mzantsi Africa,
Bamb'isandla sam,
Nam ndibamb'esakho,
Vul'intliziyo yam,
Nam ndivul'eyakho,
Ndixolele kosulw'ezo nyembezi,
Uzundamkele sakhe isizwe ngolonwabo,
Nxib'isacholo sizwe,
Nxib'isacholo buzwe,
Kuwe wena sidwesha,
nakuwe wena sidwangube!
This poem has not been translated into any other language yet.
I would like to translate this poem